Recientemente, durante conferencia di prensa, Minister di Enseñansa y Deporte Endy Croes hunto cu presidente di Arubaanse Voetbal Bond (AVB) Sr. Randolf Lacle, Sra. Dyane Wiersma y Sr. Raymbert Bikker di AVB a anuncia oficialmente cu e wega clasificativo di CONCACAF lo tuma luga dia 8 di juni proximo den Compleho Deportivo Guillermo Prospero Trinidad, unda cu Seleccion di Aruba lo enfrenta e Seleccion di Corsou.
E interes pa FIFA World Cup Qualifiers ta hopi grandi, tanto nacional- como internacionalmente. Recientemente, a haya bishita di e representantenan di CONCACAF cu a bin wak con e trabounan ta andando den stadion Dakota y a laga un lista di posibel factornan cu mester atende. A inverti mas di 5 miyon florin den renobacion di stadion na Dakota pa cumpli cu e standardnan di FIFA y CONCACAF.
Despues di e wega tan spera aki dia 8 di juni, lo cera e stadion back pa finalisa cu e trabou di renobacion. Sra. Wiersma a indica cu nan ta trahando duro pa haci e partido aki uno exitoso. Tambe a informa cu lo tin un pre evento, den cual lo duna mas detaye durante siman a traves di nan medionan social.
Fuera di esaki, Sr. Bikker a indica cu tanto prensa di Aruba, Corsou y Hulanda tin un interes hopi grandi den e wega aki. Sr. Bikker a sigui bisa cu no lo permiti pa trasmiti e wega en bibo, mirando cu tin un derecho di transmision mara na esaki. Ticket pa entrada ta disponibel caba riba Pay.aw, na Urataka Center y Citgo na final di Caya Grandi. Minister Endy Croes y AVB ta invita Pueblo di Aruba pa bin apoya nos Seleccion Masculino di Aruba dia 8 di juni proximo, cuminsando 8 or di anochi den FIFA World Cup Qualifiers den Stadion GPT na Dakota.
