Recientemente, riba rednan social ciudadanonan di Aruba a expresa nan frustracion pa e frecuencia di interupcion di coriente na diferente bario y pa diferente motibo. Cada biaha, e compania di electricidad ta informa clientenan riba rednan social di e diferente suceso, pero cu paso di cada dia, e credibilidad di e compania ta bin den duda.

“Continuamente nos ta sigura un suministro confiable di coriente na Aruba,” e compania ta indica den e seccion di “intro” riba su pagina di Facebook. Sinembargo, e realidad cu ciudadanonan ta bibando actualmente ta diferente.

Ayera merdia, tabata na un parti di e area di Seroe Blanco, Seroe Patrishi, Tanki Leendert y vecindario. Tabata pa motibo di “ta confrontando un problema den e distribucion di coriente,” ELMAR a indica sin duna mas splicacion.

Diadomingo tabata turno di area di Oranjestad,Bushiri,Paardenbaai y vecindario. E biaha aki, e “causa di esaki ta otro blaas di helium cu ta drenta den nos red di coriente y tira esaki afo.”

Y ni 24 ora prome cu esey, tabata areanan di Cunucu Abao y Pos Abao a keda sin coriente. “E motibo di esaki ta un storing ariba un di e componentenan ariba nos red di distribucion.”

Esey ainda no tabata ni e comienso, pasobra e dia prome, areanan di Paradera Cumana Tanki Leendert, Papaya Nuñe, Seroe Patrishi,Seroe Blanco un parti a keda sin coriente. “E motibo di esaki ta un storing den un kabel subteraneo,” e compania a indica.

Y diaranson siman pasa, Sabana Blanco, Primavera, Paradera, Rooi Afo y vecindario a keda sin coriente, atrobe pa motibo di un blaas di helium cu a pega den e wairanan. E dia prome cu esey, tabata Palm Beach y Kamay cu a keda sin coriente, pa motibo cu awa a drenta e trafohuis despues di trabaonan di landscaping di un compania local.

Y dialuna, tabata San Nicolas y Savaneta cu a keda sin coriente, y ELMAR no a ni duna un motibo. “Nos ta confrontando un problema den e distribucion di coriente den e areanan aki,” a bisa simplemente.

Mientras cu ciudadanonan por ta consciente cu tin diferente accidente y problema cu por causa interupcion di coriente na diferente bario, e frecuencia di e interupcionnan aki a cuminsa sembra duda entre poblacion local. Riba e ultimo post tocante interupcion di coriente ayera riba Facebook di ELMAR, usuarionan a expresa critica.

“Paradera tres biaha den menos di un siman caba, diahuebs, diabierna y awe dialuna,” un a keha.

“Ban serio si… esaki ta birando di mas. Hopi berguensa cu un isla asina popular cu turismo y ta “one happy island” tin asina hopi problema cu coriente ainda den 2024,” otro a expresa. “A para bira cos di tur dia.”

“No ta NORMAL”, otro usuario a cuestiona. “Ta kico ta pasando tur dia ta diferente bario coriente tin di bay,” un mas a cuestiona. “Cada rato tin un cos. Sin ta auto cu ta ranca palo tur dia, awo ta blaas!”

Y riba e post anterior di e storing diasabra, usuarionan a cuminsa duda e veracidad di e declaracionnan di ELMAR: “Ta ultimo tempo helium balloon a bin na moda pa interumpi coriente. E n’ta zona sospechoso??”

Otronan a agrega “cada rato mesun excuus,” “GANJAMENTO”, “Dicon tin tanto caso di helium blaas diripiente?”, y “Bin cu storia nobo, [please] pa nos kere…”