Ayera den Corte di Apelacion a cuminsa cu e tratamento di apelacion di caso Avestruz, na unda sospechoso principal ta ex-minister y actual parlamentario di fraccion AVP, Benny Sevinger. Ayera mainta a scucha e prome testigo y despues di merdia a sigui cu e di dos testigo. Segun planificacion di corte ta programa pa tratamento di e caso termina otro siman diaranson.
Segun informacion di portal Noticia Cla, e prome testigo scucha den e caso aki tabata Sra. I. Dammers, ken ta miembro di management team di Directie Infrastructuur en Planning (DIP).
Abogado David, representando sospechoso Sevinger, a solicita pa scucha e testigo aki den nomber di su cliente y a cuminsa cu e proceso di interogacion. Despues di abogado Kock, un di e tres hues cu ta trata e caso aki a interoga Sra. Dammers y por ultimo a toca turno di Ministerio Publico (OM).
E portal ta indica cu e hues primeramente a establece e relacion entre Dammers y e sospechoso Sevinger, si esaki tabata un relacion personal y/of di trabao, cual Dammers a desmenti ambos caso. A puntra e testigo si e ta famia, si tin relacion familiar y/of di trabao y di nobo Dammers a desmenti ambos caso.
Abogado Kock a haci un total di 16 pregunta na e testigo Dammers, cual tabata depende di e progreso di e respuestanan di e testigo.
Segun Noticia Cla ta señala, e intencion di abogado Kock tabata pa sa kico Dammers su envolvimento tabata den e proceso di expansion di Holiday Inn hotel, a traves di e compania conoci como ‘Presine Estates’, compania cu ta pertenece na Sr. Alfred Lowenstein.
E motibo pa esaki, e portal ta indica, ta pasobra parti di e caso ta trata e proyecto aki, unda cu e minister e tempo ey, sospechoso Sevinger, supuestamente lo a ricibi regalo y fabor como intercambio pa otorgamento di e permiso pa e proyecto di expansion di e hotel en cuestion cu mas camber.
For di e contestanan di Dammers, durante e interogacion, a saca afo cu e tabatin conocemento di e proyecto aki, aunke cu ta trata di un proyecto cu a tuma luga basta tempo pasa, na aña 2015. Dammers ta sigura cu tabatin documentacion ariba e cambio di e destinacion di e erfpacht.
Durante e interogacion a purba wak si e testigo por a confirma of desmenti kico tabata DIP su participacion den e caso aki, y mas importante ainda, kico tabata e rol di e minister en cuestion e tempo ey, esta e sospechoso Sevinger.
E noticiero ta sigui indica cu e testigo a ricibi preguntanan ariba e documentacion, como tambe e peticion di e permiso di e proyecto aki y na ken esaki tabata dirigi, na cual Dammers a contesta cu e “no ta corda”. Tambe a purba constata si e peticion pa e proyecto aki tabata algo ‘inusual’, pero Dammers a contesta, esaki no tabata e caso, pasobra segun el a bisa, cambio di destinacion di un tereno no ta algo ‘inusual’.
Tambe a puntra e testigo Dammers si minister di Turismo e tempo ey tabata envolvi den e proyecto aki di expansion di e hotel, riba cual el a bolbe indica cu “e no ta corda”. Algo cu e el menciona cu si e ta corda ta cu tabatin documento di confirmacion cu e la pasa notario, pero cu e no por a corda kico tabata e decision final di gobierno ariba e esaki.
E portal local a remarca cu algo cu a hala atencion durante e interogacion ta cu segun Dammers, su colega F. Abath, miembro di e management team, tabatin un envolvimento mas grandi cu e parti aki, pasobra tabata trata di un proyecto comercial y cu esaki tabata su colega su area di experticio.
Mester menciona cu den e caso inicial, F. Abath tambe tabata riba e lista di sospechosonan, pero a keda liber di cualkier acusacion.
NoticiaCla a sigui indica cu e abogado di sospechoso Sevinger, Sr. Kock, a keda insisti pa Dammers duna un splicacion di su envolvimento exacto den proyecto aki, y si e tabatin contacto tambe cu abogadonan. Dammers a ripiti cu ta algo cu a sucede hopi tempo pasa y cu e tabatin contacto cu su colega, F. Abath, ariba e ubicacion di e tereno, pero cu e no ta corda, atrobe, e detayenan, subrayando atrobe cu colega Abath ta esun cu tabata envolvi den esaki.
E testigo splica cu e no por confirma si e minister e tempo ey, sospechoso Sevinger, tabata envolvi den henter e proyecto aki, ni con hopi. Na e momento ey, e abogado a purba di establece of elimina cualkier tipo di sospecho ariba si Sevinger tabata envolvi personalmente den e casonan aki.
Ta menciona cu Dammers a bisa cu loke e minister en cuestion e tempo ey si tabata haci, tabata busca informacion di casonan en general, pero no di contenido specifico di casonan specifico, algo cu e minister ta liber pa haci di casonan den DIP, cu ta cay bao di dje.
Riba pregunta di hues despues tocante si DIP tabatin contacto cu e minister ariba e caso aki, Dammers a bisa cu e no tabata sa, pero cu si esaki tabata e caso mes, lo mester tabata cu Sr. Abath.
Hues a puntra tambe si e testigo tabatin contacto cu tercer partido, y cu si e mes a haci negociacion cu Prestine Properties, na cual Dammers a bolbe indica cu e no ta corda, pero cu no ta algo fuera di normal cu partidonan ta papia cu otro durante un proceso asina y cu por ta e caso en berdad cu tabatin papiamento cu tercer partidonan.
NoticiaCla ta señala cu despues hues a laga Dammers lesa un e-mail den corte, cual e testigo a admiti cu el a skirbi, den cual basicamente el splica cu e la haya pregunta y e la contesta. El a menciona cu e tabatin cierto duda riba cierto punto di e proceso, pero el a aclaria cu esey tabata su opinion personal, entre nan, si e proyecto ta corecto pa wordo ehecuta manera cu e ta wordo pidi.
Den un parti di e pregunta a puntra Dammers si e tabata di acuerdo cu mester a prolonga e tempo cu a duna na e compania pa por a ehecuta e expansion pasobra e tempo pa haci esaki lo a vence. El a contesta cu e no por a corda si e acuerdo a wordo haci of no of si a para esaki.
Por ultimo, fiscal di OM a puntra Dammers si e tabata sorprendi cu a aproba e permiso aki, na cual Dammers a contesta no, ya cu no tabatin discusion. El a bisa cu no tabata den su tarea pa ehecuta esaki y cu el a asumi cu tur cos lo a bay bon pasobra su colega tabatin experencia cu esaki.
