Cambionan den ley di Kiesverordering aproba cu 15 voto na fabor y 4 contra

Dialuna 13 di mei, Parlamento di Aruba, den reunion publico a trata cambionan den e ley di Kiesverordering. E ley aki, despues di desertacionnan di Parlamentarionan y entrega di varios mocion, pa un rato despues di 3or di atardi a keda aproba cu 15 na fabor y 4 contra. Dos persona cu no tabata presente ta Parlamentario Benny Sevinger y Parlamentario Marisol Tromp.

Prome Minister Evelyn Wever-Croes durante e reunion a duna un splicacion amplio riba e dos cambionan cu a wordo proponi y tambe a contesta e diferente preguntanan di e Parlamentarionan.

Cambio den kiesregister

E prome tin di haci cu e proteccion di privacidad di tur ciudadano di Aruba. Den e ley actual, partidonan politico por haya ful e kiesregister cu tur informacion di e votado. Esaki ta contene e fecha di nacemento, pais unda e persona a nace, su adres y ken mas ta biba na e adres y otro informacion di e ciudadano. Prome Minister ta remarca cu a base di tratado y desaroyonan internacional no por sigui duna e informacionnan personal di un persona y e ley cu a wordo trata y aproba ta pa hancra esaki y stop di duna e informacion aki.

Entregamento y condicionnan di listanan digital

E di dos cambio den e ley di e Kiesverordering tin di haci cu entregamento di listanan digital di e candidatonan y e condicionnan cu mester cumpli cune. Dia di entrega lista, e partido por scoge si ta entrega e lista fisicamente na Censo of manda e lista digitalmente via e-mail.

Prome Minister ta remarca cu durante e tratamento di e ley den Parlamento, Partido Accion 21 y Partido AVP a trece un serie di amienda padilanti y akinan a splica nan cu e amiendanan cu nan a presenta ta trata di cambionan grandi y pa esey mester cana e procedura di busca conseho entre otro na Raad van Advies, Electorale Raad of Censo y nan no a haci esaki den tur caso. Prome Minister a recomenda e partidonan pa cuminsa cu un ley di iniciativa ya cu esey ta e derecho constitucional di cada parlamentario. E partidonan tawatin obhecion cu esaki ya cu nan tawata kier pa nan amienda ta parti di e ley pero Parlamento den su gran mayoria a desaproba e amiendanan aki.

“Mi ta gradici Parlamento pa a sostene e cambionan den e ley aki teniendo cuenta asina cu e proteccion di privacidad di cada ciudadano di nos pais”, Prome Minister a expresa.