Trahadonan di APA ta tene accion di protesta

Dialuna mainta dilanti edificio di Aruba Ports Authority (APA), un grupo di trahado cu ta miembro di sindicato Federacion di Trahadonan di Aruba (FTA) a bay den accion pa protesta algun decision cu gerencia di e compania ta tumando cu ta perhudica nan.

Shopsetward di FTA, Ryan Giel tabata presente na e sitio y a splica na medionan di comunicacion local cu e sindicato a caba di sali di negociacion cu APA y cu tabatin diferente palabracion cu a wordo haci na mesa, pero aworaki e palabracionnan ey ta wordo cambia y esaki ta pone cu e trahadonan ta haya desconfiansa riba e shopstewardnan.

El a menciona cu mirando loke ta pasando nan a manda diferente carta, cu no a wordo contesta di biaha y despues di algun tempo, e shopstewardnan a tuma e decision pa bay papia cu e miembronan personalmente y esaki a resulta den un walkout.

El a indica cu den e departamento di keho di FTA, APA ta e compania cu tin mas keho riba dje den e ultimo tempo. El a remarca cu tin biaha e kehonan ta bay asina leu cu no tin otro solucion cu no ta bay corte cu nan.

El a sigui splica cu tin diferente problema y cu e hendenan riba tereno, specificamente esnan cu ta traha riba lama, ta conseha pa sigui ley maritimo, pero cu pasobra e compania kier spaar placa nan ta bisa cu nan mester subi lama cu menos hende. Tambe tin keho tambe cu ta kita dianan di vakantie y no ta pone nan back.

E shopsteward a agrega cu e trahadonan ta sinti tambe cu nan no por yega cerca gerencia pa papia di e problemanan pasobra gerencia ta keda riba un solo punto y no ta habri niun porta pa purba papia y busca un solucion.

Un di e puntonan esencial cu ta riba mesa y cu ta den discusion aworaki ta cu a wordo bisa cu pa subi lama, pa bay cierto cantidad di miya leu, mester bay cu tanto hende. E trahadonan cu ta traha riba lama pa hopi tempo sa e trabao, ta duna conseho pa subi lama, pero no ta wordo scucha.

El a indica cu a bin un momento cu en berdad por draai e luga cu menos hende, pero si algo mester pasa y un hende bira malo, mester di otro persona pa reemplasa e persona ey y sigui draai e trabao normal. Pero si no tin suficiente hende full e tripulacion por core peliger.

Tin ley, y experiencia di e trahadonan tambe ta bisa cu mester haci e cosnan di cierto manera, pero gerencia, pa deseo di spaar placa, ta manda e hendenan riba lama cu menos hende, cual no ta sigur pa e trahadonan.