(Infobae) – E inundacionnan causa pa awasero fuerte na e parti zuid di Brasil ya ta laga 147 morto y mas di 2.1 miyon di persona afecta, durante momentonan cu olanan tropical nobo ta menasa cu afecta ainda mas e region, e autoridadnan regional a informa diadomingo anochi.

Segun e datonan di e ultimo rapport di Defensa Civil, e cifra di personanan cu a keda sin hogar ta cerca di 620 mil, di cual mas di 81 mil mester a busca refugio na shelternan improvisa pa e autoridadnan.

Di mesun manera, e balans ta bisa cu e ekiponan di rescate a evacua for di e zonanan di riesgo 76,399 persona y 10,555 animal.

E situacion mas dramatico ta na Rio Grande do Sul, estado fronteriso cu Argentina y Uruguay, unda nan a reporta por lo menos 146 morto y 806 persona herdida y unda 446 di e municipionan ta afecta, e 90% di e total.

E otro fayecido a wordo notifica na e estado bisiña di Santa Catarina, cu tambe a wordo afecta pa e catastrofe pero den un escala mas chikito.

E situacion na casi henter e estado ta permanece den alerta maximo pa e pronosticonan meteorologico y e cuerponan di rescate ta probecha e tiki espacio cu e awasero ta laga pa continua cu e buskeda.

Ademas di awasero torencial por spera tambe bientonan hopi fuerte y temperaturanan abao cu por extende ta cu diamars anochi.

E Centro Nacional di Vigilacnia y Alerta di Desaster (CEMADEN) a emiti un alerta di riesgo halto pa derumbenan di tera na practicamente henter e estado y den e region metropolitano di Porto Alegre, cu atencion special riba Sierra Gaucha.

E alarmanan pa awasero ta enfatisa den e municipio di Uruguayonan, na e frontera cu Argentina, unda e awanan di e riu Uruguaya a pasa over e nivelnan y ta sigui crece.

Na henter e estado, e accionnan pa hiba cuminda, paña y medicina ta continua memey di e falta di servicionan di energia y awa cu ta wordo reestablece poco poco, principalmente na e capital di e Estado.

E dañonan ocasiona pa e inundacionnan na Rio Grande do Sul ta calcula na alrededor di 18.839 miyon di reales (3,700 miyon di dollar), segun e gobierno regional.

Te cu e momentonan aki, e presidente Brasilero, Luis Inacio Lula da Silva, a anuncia un pakete di ayudo di 50 mil miyon di reales (9,800 miyon di dollar) pa e estado ey, memey di credito y medidanan asistencial directo.