(CuraçaoChronicle) – E fraccion PAR a tuma nota di Algemene Rekenkamer (ARC) su analisis di e presupuesto pa aña 2022. E parlamentarionan di partido PAR ta bisa cu ARC simplemente ta confirma loke nan tin añanan largo ta adverti.
Durante e debate di presupuesto pa aña 2023, e fraccion PAR a demostra cu e presupuesto no ta realistico, considerando e gastonan cu no a ilustra y e ganashi cu ta disminui for di impuesto di ingreso y salario.
E coalicion (MFK y PMP) a ignora e situacion, a ataka PAR, a elogia nan ministernan, tapa wowo pa realidad y sostene Silvania su maneho. ARC a confirma loke PAR tin aña largo ta bisa.
Minister Silvania a gasta 315 miyon mas cu loke Parlamento a keda di acuerdo cune y el a colecta 207 miyon menos di loke el a priminti. Awo ta cla na e comunidad con e Gabinete Pisas a financia e compra di Campo Alegre cu fondo publico sin ningun tipo di monitor di Parlamento (coalicion).
Ademas di tur esaki, e mesun minister a scoge pa ilegalmente haci un excepcion di mas di 3 biyon den debe na impuesto di banconan y companianan miyonario.
ARC a haci yamado na parlamento pa bisti su armadura y monitor Minister Silvania. E parlamento su trabao no ta pa “elogia e Ministernan” sino di criticamente controla nan. PAR tin varios aña ta haci esaki, aunke e coalicion ta haciendo su miho trabao pa stroba esaki.
“Despues di ARC su analisis, PAR a cuminsa compila un lista di pregunta pa e minister. Ban mira si e coalicion ta sigui hunga wega of ta asumi nan personalidad, lanta di nan soño, cuminsa lesa documentonan y controla nan ministernan,” PAR su parlamentarionan a declara den un comunicado di prensa.
Na final, ta Parlamento su responsabilidad pa cu e comunidad pa e maneho di e pais su presupuesto.
