(NLTimes) – Universidad di Amsterdam (UvA) ta calcula cu e manifestacionnan pro-Palestina siman pasa a causa un total cumulativo di 1.5 miyon euro di daño. Daño causa na propiedad municipal y compania- y individuonan den e cercania no ta inclui den e calculacion, e universidad a bisa. UvA ta bay habri back su edificionan awe, cual tabata cera pa cuatro dia pa motibo di e manifestacion.
UvA a bisa cu tabatin “daño significante” como resultado di e protesta riba campus Roeterseiland y otro sitionan di campus di UvA den centro di ciudad, Oudemanhuispoort y Binnengasthuis. No ta cla ainda si e universidad kier cobra e daño na e manifestantenan. E universidad a bisa cu ta “den consulta cu varios partido” pa determina “si y con por recupera e dañonan aki.” Ta bay anuncia un decision despues.
E manifestacion a cuminsa dialuna tardi. E manifestadornan a haci tres demanda na e universidad, como tambe Vrije Universiteit y Amsterdam University College: Transparencia tocante colaboracion cu institucionnan Israeli, pa kibra tur laso cu institucionnan Israeli, y tambe kibra laso cu companianan cu ta beneficia di esaki.
UvA a publica un resumen di tur colaboracion cu grupo di ciencia Israeli, cual e universidad a bisa ya tabata informacion publicamente disponible. UvA a declara cu ta hopi cauteloso tocante limita colaboracion institucional y individual. “Nos ta mira e colaboracion cu empleado Israeli individual, tanten cu e naturalesa di e colaboracion ta den linea cu nos mision academico, como un oportunidad pa tene un linea habri hasta den tempo di guera y conflicto, e asina-yama diplomacia cientifico,” e universidad a bisa. “Kibra of suspende tur laso tambe ta nifica kibra relacion cu investigadornan cu hopi biaha ta representa e voz critico na Israel.”
Diasabra, Parool a publica un editorial firma pa 103 studiante y empleado di UvA y VU. E firmantenan, studiante Hudiu y Israeli, a bisa cu nan no ta sinti safe mas den hopi situacion na e universidadnan. Nan a skirbi cu nan ta hay’e dificil pa compronde con adheri na e exigencia di e manifestantenan di un boycott riba tur institucion Israeli en realidad ta “promove futuro pa Palestino y Israelinan.”
Les y investigacion por continua na UvA cuminsando dialuna, e universidad a anuncia diasabra.
