Instituto Kateketico Diosesano (IKDA) recientemente a anuncia cu luna di mei ta un luna special y como iglesia catolico nan ta celebra e fiesta di Pentecoste caminda scolnan lo por participa den e concurso di “Mustra bo Arte.”

Fiesta di Pentecoste tin un nificacion profundo pa motibo cu ta e tempo cu a funda iglesia catolico. Pa e motibo ey, iglesia catolico na Aruba kier yama e pueblo pa cuminsa celebra e ‘Siman Catolico’ cu segun padre Jose M. Nava, “ta un siman unda nos por descubri pakico nos mester sinti orguyo di ta catolico, religion catolico a trece y ta sigui trece, hopi gracia no solamente na nivel spiritual sino tambe na un nivel humano, esey ta un di e detayenan importante den nos fe catolico.”

Den e siman aki nan kier busca obhetivonan, esey ta cu specificamente nan kier conoce y profundisa nan fe, pero tambe nan kier mustr’e cu orguyo y pa por logra esey nan pastonan for di cada parokia tin diferente actividad den e contexto di novenanan na honor di spirito santo y den esey, por ehemplo, na Santa Cruz tin scolnan cu cada dia ta invita pa participa den e novenanan aki pa asina scolnan, mayornan y comunidad por conoce y profundisa identidad catolico, segun e padre Nava a señala.

Ademas, Adelin Trimon-Geerman a informa cu nan a traha un cinta blanco pa tur hende por bistiele, e cinta aki ta trece cu un QR Code unda hendenan por scan y tin un oracion cu por usele tur dia, esaki por hayele na diferente parokia y scolnan.

Den e contexto di siman catolico, nan tin e concurso di Rosario traha cu material di reciclahe na scolnan catolico “pa asina nos yuda nos muchanan desaroya devocion pa nos Mama Maria”

E concurso di reciclahe “Mustra bo arte” ta consisti di traha un rosario di material recicla unda tin tres categoria, scol, klas y individual, cada scol mester registra y manda e cantidad di rosario cu lo participa y den ki categoria.

E rosario aki mester ser entrega entre dia 15 y 16 di mei na Colegio Bonbini, pa dia 17 di mei, 5 or di atardi famianan ta bay tin oportunidad pa admira e rosarionan y despues lo saca e ganador, esaki ta bay tuma luga na Centro Pastoral Aruba.

E reglanan pa esaki ta lo siguiente: Solamente scolnan por registra, full e rosario mester ta di material recicla como por ehemplo di plastic, carton, papel, metal, palo, tela y hopi mas.