Corte den Prome Instancia di Aruba a tuma nota di un noticia den prensa unda ta ser bisa cu un hues di e Corte aki lo a bisa ultimo den un caso penal di Ministerio Publico contra un marinier cu e aparato di analisa rosea di Cuerpo Policial di Aruba lo no ta sirbi.
E hues concerni no a bisa esey. Corte ta referi na e contenido di e sentencia den e caso. En corto e ta bisa cu mester aplica e ley penal di Hulanda ora un marinier comete un delito pafo di Hulanda. E investigacion di e caso concerni no a tuma lugar conforme e ley penal di Hulanda. Koninklijke Marechausse (KMAR) mester a haci e investigacion encuanto coremento bao influencia di alcohol y e aparato di analisa rosea na KMAR mester a wordo usa.
Mester aplica e ley penal di Aruba ora personanan cu no ta militar comete un delito na Aruba y e aparato di analisa rosea di Cuerpo Policial di Aruba por wordo usa ora un persona ta wordo sospecha di a core bao influencia di alcohol.
