Dia 8 di mei ultimo Corte den Prome Instancia a dicta su veredicto den e caso cu Amsterdam Manor Beach Resort a entama contra Gobierno di Aruba relaciona cu e planta RWZI Bubali Plas, na unda corte a dicta sentencia na fabor di Amsterdam Manor.

RWZI ta trata e awa sushi di un parti grandi di e area di hotel na Aruba. E capacidad di RWZI ta mas o menos 4.500 m3 di awa sushi pa dia. Actualmente, e capacidad ta wordo supera grandemente. E cantidad di awa sushi cu ta drenta ta mas o menos 8.000 te 9.000 m3 pa dia y por aumenta te na 12.000 m3 pa dia durante dianan di yobida.

Amsterdam Manor a wordo construi den e decada di 80 na Eagle Beach y ta situa bao di biento di e RWZI. For di e decada di 90, e hotel ta sinti molester di RWZI den forma di mal holor y musca.

Pa varios aña e partnernan ta den combersacion tocante e molester di holor cu Amsterdam Manor ta sufri. Na 2002, pais Aruba a compromete su mes pa tuma medidanan pa limita e molestia. Den diferente caso legal entre Amsterdam Manor y pais Aruba, corte a dicta diferente sentencia. Pa loke ta importante den e procedura aki, nan a duna e siguiente veredictonan.

Den un sentencia di dia 17 di mei 2006, pais Aruba a wordo prohibi pa saca e lodo for di e tereno di RWZI pafo di e oranan di 10or di anochi pa 6or di mainta. Den un sentencia di dia 23 di november 2022, corte a haya cu pais Aruba ta actua sin derecho door di no tuma medidanan pa limita e molester cu Amsterdam Manor ta sufri for di RWZI.

Despues pais Aruba a wordo condena na: den 120 dia mester pone dos aerators nobo, adicional na e tres aerators existente y tin nan trahando, cu un straf di boet di 10 mil florin pa dia cu un maximo di 250 mil florin; den 120 dia traha tres borstelbeluchters nobo y tin nan trahando, y tambe drecha e borstelbeluchters existente y tin nan trahando, cu un straf di boet di 10 mil florin pa dia cu un maximo di 250 mil florin; den 120 dia haci e oxidatiesloot limpi, cu straf di boet di 10 mil florin pa dia cu un maximo di 250 mil florin.

Den un sentencia di dia 16 di maart 2023, e periodo di e boetnan pa e aerators y borstelbeluchters a wordo suspendi pa algun siman, pasobra pa pais Aruba tabata efectivamente imposibel pa cumpli cu e sentencianan den e sentencia di 23 di november 2022.

Den un sentencia di dia 13 di december 2023, pais Aruba a wordo condena pa sigui pone esfuersonan maximo pa pone tres aerators y seis borstelbeluchters trahando. Tambe pais Aruba a wordo condena pa aplica bioaugmentation (un proceso unda ta cria microorganismonan cu ta descompone desperdicio) sin interupcion segun indicacionnan di e proveedor, cu obligacion pa duna Amsterdam Manor un lista di e encargonan poni y cu straf di boet di 170.584,73 florin pa luna cu pais Aruba no cumpra e bioaugmentation necesario.

Den un sentencia di fondo dia 13 di december 2023, corte a declara cu for di 2002 pais Aruba a actua sin derecho (y ainda ta actua) contra Amsterdam Manor pa no tuma of pa no tuma suficiente medida pa pone RWZI traha bon y mantene e planta pa e por trata e cantidadnan di awa sushi y cu ta wordo descarga di un manera adecua y procesa di tal manera cu Amsterdam Manor no ta sufri molester di RWZI den forma di holor y/of musca.

Tambe pais Aruba a wordo condena pa paga e daño cu Amsterdam Manor ta sufri y a sufri pa e molester sin derecho. E suma di e daño lo mester wordo determina den un procedura separa.

Pais Aruba no a cumpli na tempo cu e diferente condenanan y a paga 710 mil florin na Amsterdam Manor pa e diferente multanan.

Riba peticion di Amsterdam Manor, e empresa GlobalPro, cu a ta envolvi den un prueba cu bioaugmentation na 2023, a raporta lo siguiente:

“Nos kier enfatisa cu no ta posibel pa trata mas di 4.500 m3 di awa residual cu 100% di e ekipo trahando y sin bioaugmentation. P’esey, logrando un balanse perfecto entre Operacion di Mashinnan, Extraccion di Lodo y Bioaugmentation ta e unico manera pa logra un solucion duradero durante tempo.”

Pais Aruba tin plan pa privatisa e plantanan di RWZI y transferi nan pa AWSS, un compania di Utilities Aruba NV y accionista di Utilities Aruba ta pais Aruba. E proyecto di Ley pa privatisa RWZI a wordo presenta na Parlamento dia 16 di april 2024. E siman aki gobierno a ricibi e preguntanan for di parlamento y aworaki ta en espera pa trata e ley den sala di Parlamento.

Pa loke ta e veredicto di dia 8 di mei ultimo, corte a dicta cu pais Aruba cu den 30 dia despues di fecha di entrega di veredicto pais Aruba mester pone y mantene cinco aerators trahando na RWZI na Bubali, cu un straf di boet di 25 mil florin pa dia of pa parti di un dia cu no tin minimo cuatro aerators trahando, cu un maximo di 500 mil florin.

Pais Aruba mester pone y mantene seis borstelbeluchters trahando na RWZI na Bubali, cu straf di boet di 25 mil florin pa cada dia of pa parti di un dia cu no tin minimo cinco borstelbeluchters trahando, cu un maximo di 500 mil florin.

Nan mester pone tambe tres tanki di sedimentacion final trahando na RWZI na Bubali, cu straf di boet di 25 mil florin pa cada dia of pa parti di un dia cu no tin minimo dos tanki di sedimentacion final trahando, cu un maximo 500 mil florin.

Corte ta dicta tambe cu pais Aruba mester kita e lodo (sludge) acumula for di e oxidatiesloot di RWZI na Bubali tur dia den su totalidad y bay dump na Zeewijk of Parkietenbos pa tira esaki, cu straf di boet di 25 mil florin pa cada dia laboral of parti di un dia cu e lodo (sludge) no wordo kita completamente, cu un maximo di 500 mil florin.

Pais Aruba mester kita e scuma den e oxidatiesloot y/of reservoir di RWZI na Bubali dentro di 24ora despues cu esaki surgi, completamente y hiba esaki dump, cu straf di boet di 25 mil florin pa dia of parti di un dia cu e scuma no wordo kita na tempo of completamente y hib’e dump, cu un maximo di 500 mil florin.

E veredicto ta indica tambe cu pais Aruba mester tuma como minimo un muestra di awa residual cu ta drenta RWZI y un muestra di awa residual cu ta sali for di RWZI pa superficie di awa, cada dia, y test e muestra aki dentro di 24 ora na e manera habitual, y manda e resultadonan di e test den 24 ora despues di ricibi nan na e proveedor di e microorganismonan cu a wordo usa na e dia di test y na Amsterdam Manor, cu un straf di boet di 10 mil florin pa dia of parti di un dia cu nan no ta cumpli cu e condena aki, cu un maximo di 200 mil florin.

Corte a dicta tambe cu Pais Aruba mester manda semanalmente pa Amsterdam Manor e siguiente informacion: e cantidad di aerators cu ta trahando; e cantidad di borstelbeluchters cu ta trahando; e cantidad di tankinan di sedimentacion final cu ta trahando; cual dia nan a kita e lodo (sludge) completamente; cual dia nan a kita e skuma completamente; y e resultadonan di e testnan diario, cu un straf di boet di 10 mil florin pa cada siman cu pais Aruba no manda e informacion aki, cu un maximo di 200 mil florin.

Tambe pa 1 di september 2024 pais Aruba mester pone na traboa un of varios instalacion di RWZI mobil cu capacidad adecua, pa asina RWZI na Bubali (incluyendo e instalacion existente) por trata como minimo 12.000 m3 di awa residual pa dia for di e fecha ey, te ora un RWZI nobo ta cla y poni na traboa, cu un straf di boet di 450 mil florin pa luna pa cada luna di e calender for di 1 di september 2024 cu pais Aruba no a cumpli completamente cu e condena.

Pais Aruba mester paga e gastonan legal di e procedura di Amsterdam Manor, cu ta wordo calcula pa e fecha di e sentencia na 2.178,60 florin, cu e interes legal riba e gastonan di e procedura for di 14 dia despues di e fecha di e veredcito te dia cu e gastonan di e procedura ta paga. Pais Aruba mester paga tambe e gastonan legal di e procedura di AWSS, cu ta wordo calcula te na e fecha di e sentencia na 1.500 florin pa salario di e mandatario.