Diaranson ariba su pagina di Facebook minister di Transport, Integridad, Naturalesa y Asunto di Adultonan Mayor, Ursell Arends, a publica cu corte a dicta cu gobierno por usa e incinerator cu ta percura pa kima cierto tipo di desperdicio toxico.
Manera ta conoci e incinerator ta inactivo pa casi seis luna pa motibo di e veredicto cu un hues a dicta na december aña pasa. E mandatario a señala den su publicacion diaranson ultimo cu Hof di husticia a indica cu e hues e tempo ey no a evalua tur cos debidamente y cu gobierno mester por haci uzo di e incinerator.
“Ministerio di Naturalesa ta satisfecho cu Hof a mira e impacto negativo cu tin den medio ambiente na momento cu prohibi gobierno di haci uzo di e incinerator. Na momento cu a cera e dump na Parkietenbos y a paga e candela grandi riba dump, a scoge pa sigui usa e incinerator. Esaki pa motibo cu tin cierto tipo di desperdicio, e asina yama ‘desperdicio critico’, pa cual e unico solucion responsabel y sostenibel ta pa kima esakinan,” minister Arends a remarca.
E tipo di desperdicio cu ta wordo cataloga como desperdicio critico, el a splica, ta inclui slib cu ta bin di RWZI, carcas di bestianan morto, desperdicio medico y cierto productonan confisca cu conforme ley mester wordo destrui.
E mandatario a subraya cu alternativa pa kima riba dump den aire liber manera tabata wordo haci den pasado no ta aceptabel y ta causa mas daño. El a agrega cu ministerio di Naturalesa a haci esfuerso grandi pa paga e candela y ta den proceso awo pa paga otro candela cu tin den sub-suelo na dump. Esaki ta e candela cu tin den e cero y cu ainda ta produci holo desagradabel.
Minister Arends a resalta cu Hof a duna instruccion hopi concreto ariba e forma con mester anda cu e incinerator. Esaki ta algo cu e conocido activista, Anouk Balentina, ken a hiba gobierno corte na mas di un ocasion pa e diferente problemanan cu no solamente dump na Parkietenbos, pero tambe e incinerator, a resalta tambe.
Reaccionando ariba e publicacion aki, Balentina a publica cu e decision hudicial ta contradeci e afirmacionnan di minister Arends cu e incinerator por funciona sin restriccionnan mas grandi.
“Contrario, corte en realidad a impone rekisitonan estricto cu e pais mester cumpli. E decision aki tambe ta temporal y ta aplicabel te ora cu corte dicta un sentencia firme den e caso di apelacion,” e activista a subraya.
