Awe na Parlamento di Aruba lo dicidi si ta aproba of no e ley di matrimonio igualitario. Partido Raiz a señala cu e lucha aki no ta un lucha pa un ley, pero e ta un lucha basa riba e compromiso hancra den statuut.

Partido Raiz, cu a demostra di ta comprometi cu inclusion, manera nan ta bin señalando, a expresa cu e lucha pa e derecho di matrimonio entre pareha di mesun sexo no ta solamente tocante e legalisacion di un relacion cu a sali di amor; e ta tocante e reconocemento di e dignidad inherente y e balor di cada individuo.

Pa Raiz e no ta solamente un slogan of un dicho, sino un principio cu nan ta para pe y ta encera e creacion y existencia di harmonia den sociedad, un Aruba den harmonia ta un Aruba caminda union, solidaridad, respet, y empatia ta reina, y tur cu tin curason puro por sinti nan mes balora y cu nan tin un luga den e pais aki.

“Raiz a planta e simia y e tera fertil e cual ta nan principionan di igualdad, respet, inclusion y e fruta di nan cosecha, ta harmonia. E ley aki lo contribui na fortalece nos comunidad na unda no tin discriminacion ni diferencia pa tur esnan cu ta ser motiva door di amor di mesun sexo,” ta sigura den un comunicado di prensa.

Ora ta nenga parehanan di mesun sexo e derecho pa casa, ta nenga nan e derecho humano basico di felicidad y bienestar y akinan “nos ta manda un mensahe cu nan amor di algun manera ta menos valido, menos valioso pa kibra. Alabes nos ta reconoce nan libertad pa scoge nan propio bida, y nos ta mara nan na cadenanan di limitacion pa realisacion propio.

Aruba a lanta como un pais cu ta orguyoso di su hospitailidad, un Aruba cu ta orguyoso di por bisa cu riba e baranca chikito aki tin espacio pa mas di 90 otro nacionalidad, como tambe diferente religionnan cu ta biba den harmonia cu otro a pesar di diferencianan.

“No ta importa di unda bo ta bin, bo color di cuero, bo creencia of religion, Aruba tin un luga pa bo tambe. Con mas orguyoso nos lo ta ora di berdad y den tur sentido, nos por bisa cu na Aruba ningun hende ta wordo discrimina a base di ken e ta dicidi di stima. Cu tur hende por ta inclui cu e mesun derecho pa biba den harmonia cu otro?”

E decision di 8 di mei ta keda den mannan di e personanan cu ta funciona den e organo di mas halto di e pais aki, e decision pa reconoce cu tur ser humano na Aruba tin e derecho fundamental di expresa nan stimacion pa un otro prohimo libremente.