Ayera mainta durante un conferencia di prensa di gobierno, prome minister Evelyn Wever-Croes a elabora ariba e tema di e planta di RWZI y e decision cu gobierno a tuma pa privatisa esaki y traspas’e pa e compania estatal Utilities Aruba NV.

E mandatario a remarca cu pa loke ta trata e tema di RWZI, cual pa basta tempo ta e prioridad number uno di Gobierno di Aruba y tambe di sector priva, specialmente e sector turistico, por mira cu e problemanan relacion na e planta cada biaha ta bira mas grandi.

El a splica cu desde cu nan a drenta gobierno, Gabinete Wever-Croes, a tuma e decision cu ta bay busca un solucion mas drastico pa motibo cu ya caba den Gabinete Wever-Croes I nan a purba diferente alternativa pa yega na un solucion pa e problema aki, pero no a logra.

Den Gabinete Wever-Croes II a encarga e tema aki na minister di Naturalesa, Ursell Arends y hunto cu minister di Energia, Glenbert Croes, y asina hunto a bin cu e proposicion na conseho di minister pa privatisa e planta di RWZI y den cuadro cu esaki Utilities Aruba NV a indica cu e tin interes pa tuma over e planta y asina traha mas riba generacion di energia alternativo tambe.

Prome minister a splica cu e necesidad pa privatisacion ta pa motibo cu pa hopi aña caba, no solamente durante mandato di Gabinete Wever-Croes, pero tur gobierno prome, no tabata por a haci e inversionnan necesario den e planta aki y no por a garantisa un inversion structural den e planta.

Esaki ta debi na problemanan financiero, y specificamente pa Gabinete Wever-Croes un di e motibonan mas grandi tabata e pandemia di COVID-19, ya cu e placa cu Aruba tabatin mester a wordo inverti den otro prioridadnan,

“E falta di inversion cu mester a tuma luga durante hopi tempo cu no a tuma luga a pone e planta den un estado critico,” el a destaca.

E mandatario a indica cu na momento cu su gobierno tabatin e posibilidad pa acumula e fondonan necesario pa por a haci inversion, pa motibo di normanan financiero y supervision financiero, entre otro, nan no por a haci e inversionnan aki tampoco.

Asina gobierno a yega na e conclusion pa privatisa e planta, pas’e den man di un entidad estatal di gobierno cu si tin e forsa y posibilidad pa busca financiamento pa por traha un planta nobo.

“Un planta nobo ta costa hopi hopi placa y gobierno no tin e placa ey, ni ki nos haci nos no ta yega na e placa ey y e normanan financiero cu pais Aruba tin aworaki ta prohibi nos pa presta placa pa inverti den un proyecto asina grandi,” prome minister a subraya.

Manera ta conoci e planta ta pasa over pa Utilities Aruba NV y e mandatario a indica cu esaki ta bay over cu e incineratornan tambe y cu full e sistema di rioolering cu tin un balor, pero cu ta un riesgo pasobra pa hopi tempo no a mantene e sistema di rioolering tampoco. Tur esaki ta bay over pa un compania cu Utililities Aruba NV ta bay incorpora.

El a splica cu pa por financia e trabaonan aki, pasobra gobierno tin cu paga e compania pa haci e trabao, lo bin un aumento den e environmental levy, un tipo di impuesto cu ta wordo cobra na turistanan pa loke ta trata contribucion na medio ambiente. “Esaki ta hustamente e meta di e impuesto aki cu e turistanan ta paga pa por yuda nos cu e problemanan di medio ambiente,” el a resalta.

El a indica cu e ley pa privatisacion di e planta di RWZI a bay Parlamento y e awe gobierno ta ricibi e preguntanan di parlamento pa asina por wak kico ta e puntonan cu nan ta trece dilanti. El a agrega cu parlamento tambe a tene, y ta teniendo ainda, consultanan cu stakeholders y esey tambe gobierno lo atende cu cu nan e.

Gobierno na su turno mester contesta e preguntanan aki y e ora cu esey por prepara pa bay trata e ley den Parlamento di Aruba. “Esaki ta trece un solucion definitivo pa e RWZI pasobra e ta un problema serio,”

El a señala cu e compania estatal a traha un plan di emergencia riba termino corto, termino mediano y termino largo pa asina por percura cu no ta haya molester mas di e planta aki.

Prome minister a indica cu e compania estatal lo inverti den un planta nobo pa expande e capacidad, pasobra e planta aki a wordo traha tempo cu no tabatin hopi turismo y aworaki cu e cantidad di turismo cu e isla tin, ta pasa e capacidad di esaki.

Contestando pregunta di prensa ariba loke ta e cantidad di e aumento di e environmetal levy, e mandatario a splica cu e cantidad di aumento den e enviromental levy ta depende di e grandura di e camber. Cada camber tin un otro tarifa y tur ta bay aumenta cu un poco. El a agrega cu e aumento aki ta bay drenta na vigor na mesun momento cu e ley di privatisacion drenta na vigor.

Pa loke ta con a yega na e decision pa bin cu aumento den e environmental levy, el a splica cu tabatin diferente discusion cu a wordo hiba riba kico ta e miho manera pa yega na e fondonan y e decision mester a wordo tuma entre si ta pidi pueblo di Aruba pa paga un belasting extra pe of si ta pidi turistanan pa paga e belasting pe.

El a remarca cu e proposicion cu a wordo haci pa laga pueblo di Aruba page pe a wordo rechasa pa gobierno mirando cu a caba di introduci diferente ahuste cu no ta laga espacio pa pidi pueblo di Aruba un biaha mas pa esaki y asina a dicidi cu ta pone e aumento riba e sector turistico.