(USAToday) – Den inicio di añanan 2000, Gloria Mark a nota cu e tabata haya problema pa pone atencion riba un solo pantaya. Anecdoticamente, e tabata sa cu otronan tabata sinti mescos. Como psicologo y cientifico, el a dicidi pa test esaki – computer ta afectando nos atencion?
Durante dos decada di investigacion, e contesta ta un abrumante “si.” E era digital tin impacto riba nos habilidad pa enfoca. Esaki ta pasando cu bo tambe? Aki kico expertonan ta recomenda pa mehora bo atencion.
Kico ta e capacidad averahe di atencion? Mark, un chancellor’s professor emerita na Universidad di California Irvine y autor di “Attention Span,” a cuminsa studia capacidad di atencion na 2003. El a haya cu hende a pasa un averahe di dos minuut y mey riba cualkier pantaya di computer prome cu cambia pa otro. Na 2012 el a ripiti e estudio y a mira cu e tempo a reduci na 75 seconde. Ora el a studia esaki pa un di tres biaha entre 2016 y 2020, e capacidad averahe di atencion tabata apenas 47 seconde.
Pakico e capacidad di atencion a bira asina cortico? Mientras cu e narativa publico ta cu algoritmonan ta culpable, Mark ta bisa cu cos ta un tiki mas complica. El a identifica varios factor cu influencia riba capacidad di atencion – diseño di internet, algoritmo, personalidad, necesidadnan social di humano y e paisahe general di medionan di comunicacion.
Cu hyperlink, tagged photo y aviso pop-up, internet ta diseña como un “rabbit hole” cu ta mantene nos online. Esaki ta crea un rollercoaster di buskeda di recompensa, segun psicologo clinico y director di Centro pa ADHD, Marcy Caldwell. “Nos ta alcansa un peak na e nivel mas halto ora nos ta haci e cambio pa e (tab) nobo y despues e nivel ta baha atrobe, pues nos ta hambra pa mas,” Caldwell ta bisa.
Algoritmonan di rednan social ta diseña pa tene usuarionan riba e plataforma. TikTok ta vigila bo likes, comentario y con largo bo ta mira video pa duna bo contenido cu ta mantene bo ta scroll. Algoritmo di Facebook por incorpora mas di 10mil señal diferente pa predeci e probabilidad di un usuario su interaccion cu un post, segun Washington Post.
E algoritmonan aki ta hacie “hopi dificil pa bira lomba pa tecnologia,” Mark ta bisa. TikTok en particular ta “hopi agil” y ta siña lihe con pa pone bo consumi contenido.
Con pa mehora atencion
Tin dos tipo di atencion – rutina y activo. Atencion activo ta un estado interactivo y retador di enfoke, Mark ta bisa, manera lesa un buki dificil of skirbi un documento. Ora bo ta interactuando pero no tin reto, manera wak video of hunga Candy Crush, bo ta usa atencion rutina.
Den su investigacion, Mark a haya cu hende ta mas contento ora ta usando atencion rutina pero ta experimenta realisacion mas profundo ora nan ta usa atencion activo. E tipnan aki ta balansa e dos.
1. Duna prioridad na break
Ambos tipo di atencion ta importante, y break tambe ta importante. Hende ta pasa door di un ritmo natural di atencion enfoca durante dia, segun investigacion di Mark a haya. Mientras tur hende ta diferente, tipicamente nos ta experimenta un enfoke peak mita di mainta, y un biaha mas den atardi.
No spera pa semper ta enfoca y productivo, Mark ta bisa. Ora nos ta fatiga, nos habilidadnan funcional ehecutivo ta agota y nos no por presta mesun bon of scapa distraccion. Esey ta e señal cu ta ora pa un break.
E miho manera di break ta ley di aparato electronico, y pafo, cual investigacion ta mustra por reduci stress. Pero si no por bay pafo, ta OK pa hunga un wega riba bo telefon of otro actividad rutina, manera cose, pa duna bo mente un momento pa descansa y ta los. Djis sigura cu ta pone un timer pa asina no keda pega den e actividad, mark ta bisa.
2. Evita distraccion en bes di resisti distraccion
Distraccion ta natural, pero por ta dificil pa re-enfoca. Caldwell ta bisa cu resisti distraccion ta agota nos funcion ehecutivo pasobra nos mester tuma nota di dje, hala leu, y bisa nos mes no, y esaki ta tuma esfuerso.
Pa evita distraccion, usa headphones cu ta cancela zonido; toca musica pa enfoca, manera clasico; pone bo lessenaar dilanti un muraya; purba traha banda di un partner cu lo tene bo responsable; paga notificacion di rednan social; instala un blocker pa rednan social.
3. Practica meta-consciencia
En bes di click inconscientemente, practica ta consciente di loke bo ta haci ora bo ta hacie, Mark ta bisa. E habilidad aki ta bay yuda bo bira mas intencional ora di ta online. Puntra bo mes ora bo haya gana di habri un app, “realmente mi mester bay riba rednan social aworaki?” of “realmente mi mester check e notificacion aki?”
4. No purba multi-task
Lubida di multi-task – e no ta existi a menos cu un di e tareanan ta automatico, manera core un auto riba un caminda stret y papia cu un pasahero. Den tur otro scenario, bo ta cambiando bo atencion rapidamente entre dos tarea, cu ta dura mas largo, ta resulta den mas eror y ta aument astress.
5. Duna prioridad na salud general
Drumi bon – tanto den calidad como cantidad – ta importante pa cuminsa bo dia y capacidad di atencion riba bon pia. Un dieet balansa y nutritivo tambe por reforsa energia y concentracion. “Ora nos nivel di sucu baha, nos cerebro ta desvia recurso leu di nos cortex prefrontal, cu ta unda e funcion ehecutivo ta,” Caldwell ta bisa.
