Ayera 3 di mei ta e fecha di conmemoracion di Dia Mundial di Libertad di Prensa den cual a tuma luga na Chile e conferencia di World Press Freedom Day 2024 na Chile caminda UNESCO Aruba tabata presente.
E aña aki e tema di e conferencia tabata “Periodismo frente e crisis ambiental” cual ta dedica na importancia di periodismo y libertad di expresion den contexto di e crisis ambiental global.
Den e ceremonia di apertura tabata presente e director general di UNESCO, Audrey Azoulay, presidente di Republica di Chile, Gabriel Boric, Michelle Bachelet, ex-presidente di Chile y ex-director ehecutivo di ONU Mujeres, y el actor y activista Mexicano Gael García Bernal, entre otronan.
Pa loke ta trata Aruba, Birgit Kreykenbohm, specialista di Comunicacion & Informacion na secretariado di UNESCO Aruba tambe tabata presente den e conferencia aki.
Crisis di clima y biodiversidad no ta afecta solamente medio ambiente y ecosistema, sino tambe e bida di miles di miyon persona na henter mundo, nan storia di agitacion y perdida mester wordo reconoci y comparti, no semper ta storianan agradabel di wak, incluso, por ta perturbador, pero conociendo nan ta posibel pa por actua y expone e crisis ta e prome paso pa e por haya un solucion.
Pa e motibo aki, e rol di periodismo ta crucial y nan ta dedica e aña aki pa reconoce y celebra nan labor y yuda construi un miho futuro.
