For di diabierna 26 di april e pushi “PJ” – manera su doño Daniel Taborda ta yam’e – ta perdi. E suceso a tuma lugar na momento cu a lag’e na un veterinario na Ponton pa por wordo sterilisa. Bon Dia Aruba a tuma contact cu Taborda pa scucha su historia unda a haya sa cu esaki no ta e unico caso.

Den un post riba rednan social, Daniel Taborda a informa cu su pushi PJ ta perdi for di algun dia caba for di momento cu el a hib’e na veterinario VHS Veterinary Specialty Hospital Aruba na Ponton pa por wordo sterilisa. Pero pa su sorpresa, ora el a bay busk’e back diasabra mainta, personal di e veterinario a bis’e cu su pushi a perde y nan tabata bezig ta busk’e.

E mesun dia ey, Taborda a splica cu el a haya un yamada di e veterinario unda nan a bis’e cu e dia ey e negoshi tabata cera pa motibo di Dia di Rey y nan no tabata trahando. Igualmente nan a señala cu por ta cu un bentana tabata habri y asina e pushi por a huy.

Dialuna mainta, 29 di april ultimo, Taborda a bay back na e veterinario unda el a pidi ayudo di Polis y a splica nan loke a sucede cu su pushi na e luga aki. E mester a tuma e accion aki pa motibo cu personal di veterinario no por a splica kico precies por a pasa cu su mascota. El a conta cu polis a bay cune y a graba algun video pa por tin prueba den caso cu lo tuma accionnan legal. Ademas el a conta na Polis otro storia di otro hendenan cu a tuma contact cune recientemente, indicando cu nan mascota tambe a disparce for di e luga aki. Un di nan a tuma luga dos aña pasa.

“Polis a intermedia cu nos y nan a purba di haci un tiki di investigacion. Nan a puntra e dokter si esaki tabata e prome biaha cu a pasa, nan a contesta cu esaki a pasa dos of tres biaha. Pero obviamente ta bon conoci caba cu nan ta perde pushi y hasta a perde un cacho, di locual mi a tende for di un hende,” el a sigura.

Segun e veterinario a bisa na Taborda, su pushi a huy for di un bentana cu no mester tabata habri, “cual tabatin un tape poni bisando ‘no habri.’ E tape tabata mustra hopi bieu caba, l cual por bisa cu e bentana tabatin tempo asina,” el a comenta.

Taborda y e veterinario a yega na un acuerdo pa e por haya back e placa bdi operacion di sterilisacion di e pushi, pero te ainda e no sa si nan a logra oper’e; na e momentonan aki, Taborda hunto cu su famia ta bay wak kico ta e proximo paso cu nan lo tuma.

Haciendo un investigacion riba Facebook, Bon Dia Aruba a haya mas publicacion tocante e veterinario aki. Na aña 2022 un otro persona a post su experiencia similar cu su pushi preto, caminda el a puntra su mes con un pushi preto ta huy for di e luga aki.

“Mi ta kere cu e mascotanan cu nos ta hiba na e luga aki pa mehora nan salud ta fayece den nan cuido y nan no kier para responsabel of nan no tin e VALENTIA pa bisa a nos como e mama/tata di e babynan aki, cu lamentablemente boso mascota no a make it. Please no hiba boso mascota akinan, paso[bra] bo lo keda mescos cu a mi y mi famia, semper [puntrando bo mes] kico di berdad a pasa cu nos Raven,” el a expresa.

Tambe a haya un post reciente riba Facebook contando un otro storia:

“[Keda leu for di e lugar aki]… Jeff tambe a haya problema grandi pa via di nan ora a bin cu su cacho pa Hulanda. Nan a cobra pa fix papelnan y vacunanan pa por biaha bin Hulanda. Ora el a yega akinan, nan no a laga e cacho drenta paso[bra] su papelnan no tabata na ordo, su vacunanan no tabata documenta bon y nan no a hiba e papelnan Veterinaire Dienst tampoco pa haya e stempel di aprobacion. Despues cu nan a bisa cu nan mes lo regel tur cos. Door cu nada tabata klop, pober Diesel mester a haya tur su vacunanan di nobo akinan na Hulanda paso[bra] riba e papelnan no tabata duidelijk poni cu el a haya nan caba. E mester a keda den cuarentena na un honden pensioen, y tambe e transport pa hib’e e pensioen mester a paga. Total e gastonan a sali casi €700 cu Jeff mester a saca di su saco pa drecha fout cu nan a haci. Pa colmo hasta number di chip di Diesel nan a skirbi fout; door cu e persona cu a atende nos akinan na Hulanda no kier a haci moeilijk nan a laga nos bay cune. Al fin a yama pa reclama, y tur hende a laba man. Niun hende kier a tuma responsabilidad pa e situacion, nan no a yuda cubri niun parti di e gastonan. Na Veterinaire Dienst despues nos a bin haya sa cu mas hende tambe a haya nan den mesun problema pa via di nan… Esaki tabata na 2022… increibel con ainda nan ta funcionando y pa tende cu awo nan ta te hasta perde pushi di hende,” E persona a skirbi riba Facebook.

Bon Dia Aruba tambe a tuma contacto cu un persona ken a conta su experiencia personal na momento cu el a rescata un cacho. A hib’e na e veterinario aki, y e veterinario a haci test sin informa ni pidi permiso di e doño. “Tin mas caso di personanan cu a perde nan mascota eynan, riba e pagina di Facebook Lost and Found Pets Aruba tin por lo menos dos caso mas. E veterinario aki ta teribel, no solamente ta duna mal servicio sino tambe ta tende storia tocante e veterinario,” e persona aki a bisa.

Bon Dia Aruba a tuma contacto cu e veterinario en cuestion pa asina por haya sa nan band’i medaya. Ayera nos redactor a manda varios pregunta via e-mail, manera nan a indica pa haci, y ta wardando riba nan contesta pa asina por publica esey tambe.

Te ayera, Taborda y su famia a señala cu nan no tin conocemento di na unda “PJ” por ta. Nan no sa si e ta na bida ainda, pero nan ta spera cu si. Nan como su famia ta ward’e y a expresa cu si un hende por wak PJ algun caminda por comunica cu nan na e number 5636067.