Durante un conferencia di prensa di gobierno ayera mainta Minister di Labor, Energia y Integracion, Glenbert Croes, a anuncia cu e cifra di desempleo pa aña 2023 a baha te na 4%, un cifra record, segun e minister a remarca.

Minister Croes a splica cu desde cu Gabinete Wever-Croes a asumi encargo di gobernacion di pais Aruba, e cifra di desempleo a bin ta bahando den un forma positivo. El a indica cu na momento cu nan drenta gobierno na aña 2017, e porcentahe di desempleo tabata na 8.9%.

El a resalta cu gobierno a bin cu iniciativanan pa mehora e mercado laboral y asina a logra baha e porcentahe di desempleo na 2018, te na 7.3%, y na 2019 te na 5.2%.

Manera ta conoci na aña 2020, Aruba y henter mundo a enfrenta e pandemia di COVID-19, cual a conduci na un aumento grandi den e porcentahe di desempleo atrobe hibando e cifra aki te na 8.6%. “Considerando e impacto desastroso cu e pandemia aki tabatin riba pais Aruba, e cifra por tabata pio,” e mandatario a remarca.

Minister Croes a indica cu na momento cu Aruba a conoce su prome caso di COVID-19, Gobierno mester a tuma e decision pa cera e frontera, evitando asina cu bishitante por drenta pais Aruba. Mirando cu turismo ta e pilar di economia di pais Aruba, esaki tabatin un efecto desastroso riba e economia di Aruba.

El a sigui indica cu na 2021, e cifra a subi na 8.8%, pero na aña 2022, mirando e recuperacion economico di pais Aruba, e cifra aki bolbe baha na 4.3%. “E cifra aki di 4.3%, ta un muestra di tur e iniciativanan cu gobierno a bin cune pa e mercado laboral. Gobierno a enfoca na pone nos hendenan local prome na trabou, y tambe a bin cu un politica di integracion na unda a duna esnan cu tabata fisicamente na Aruba e oportunidad pa legalisa nan mes, aportando asina na e caha di gobierno,” el a resalta.

Pa loke ta e cifra di desempleo pa aña 2023, minister Croes a subraya cu a logra yega na un cifra record di 4% di desempleo.

El a remarca cu nan ta logrando e esfuerso aki a traves di Enseñansa pa Empleo (EPE) cu ta capacitando e ciudadanonan. Aworaki EPE ta habri tambe pa hobennan di 16 aña en adelante pa nan tambe tuma curso, cual antes no tabata e caso.

E mandatario a indica cu nan ta bay enfoca riba un job fair pa hobennan entre 16 y 24 aña mirando cu e cifra di desempleo entre hobennan a subi cu 1.2% den aña 2023. El a remarca cu ta nan spera cu e motibo pa e aumento aki ta cu e hobennan ta scoge pa sigui studia, en bes di traha.

El a menciona tambe cu nan a institui un task force special cu ta wordo dirigi pa Ministerio di Labor, Enseñansa pa Empleo y DPL cu ta encarga pa comunica cu e tres hotelnan cu ta bay habri nan portanan e aña aki, cual ta Secrets, St. Regis y Iberostar, pa na momento di yena e cuponan di trabao cu ta bay habri, nan preferencia na e hobennan local.

Durante e reunion publico den parlamento dia 16 di april, e mandatario a enfatisa cu mientras cu ta bay tin mas hende riba mercado laboral, y ta premira cu pa e tres mil cambernan cu

ta bay habri ta bay tin mester entre nuebe mil pa dies mil hende cu lo bin extra riba mercado

laboral, tin mas o menos 10 mil hende indocumenta na Aruba, pero e preferencia mester keda pa e ciudadanonan local.

El a agrega cu alabes cu diferente organisacion y instancia di e mercado laboral a bin ta organisa diferente tayer y job fairs pa motiva ciudadanonan agresivamente pa subi e mercado laboral y yena e vacaturanan cu tin habri.

E mandatario a indica cu door cu e cifra di desempleo entre hobennan a subi, ta bay organisa un job fair cu ta bay enfoca specialmente riba e hobennan. E cifra di desempleo entre hobennan pa 2022 tabata 9.9% y pa 2023 e ta 11.1%, cual ta indica un aumento di 1.2%.

Di otro banda minister Croes a menciona cu pronto gobierno lo ta bayendo Parlamento di Aruba pa introduccion di minimumuurloon (salario minimo pa ora). El a resalta cu asina e salario minimo ta aumenta pasobra ta bay cambia di un salario minimo mensual pa un salario minimo pa ora y esey ta bay trece cambio den e forsa laboral enormemente.

Apart di esaki, el a indica cu ainda mester bay parlamento tambe cu e ley di ARBO cual ta un ley cu ta enfoca ariba e bienestar y salud di tur trahado na trabao y kico ta e medidanan cu ta wordo exigi pa tur trahado por disfruta di e bienestar y salud laboral aki.