A traves di un comunicado di comunicado di prensa prome minister Evelyn Wever-Croes a indica cu diahuebs mainta a reuni cu DOW ariba diferente proyectonan cu tin andando. Un id e temanan cu tambe a bin pa dilanti durante e reunion ta e topico di RWZI, un tema cu pa hopi tempo caba ta di suma importancia y pa cual ta busca un solucion urgente, specialmente pa e planta RWZI di Bubali Plas.

Segun Wever-Croes a menciona den e comunicado, durante e reunion a trece pa dilanti no solamente e plantanan di RWZI na Bubali, pero tambe RWZI Parkietenbos y RWZI Zeewijk. Gobierno di Aruba, den un intento pa trece un solucion pa problema di RWZI, a tuma e decision di privatisa RWZI.

Prome minister a indica cu e ley aki ta na Parlamento aworaki y ta spera cu pronto por yega na privatisa e plantanan y esakinan ta pasa over y bay den man di un compania estatal Utilities NV. El a remarca cu e compania estatal aki si tin e forsa y e capacidad financiero pa haci e inversion necesario pa alivia e situacion actual cu tin na RWZI.

E mandatario a indica cu ya den pasado Gobierno di Aruba a purba di pone den e presupuesto 16 miyon florin pa inverti den RWZI, pero bao presion di e CAft (College Aruba financieel toezicht), Wever-Croes a remarca, Gobierno mester a kita e fondonan aki debi na e situacion financiero di pais Aruba.

Manera ta conoci RWZI a surpasa su capacidad ya pa basta tempo caba. Turismo a crece, pero e capacidad di e planta no a crece. Varios gobierno a purba trece solucion pero no a logra. Durante pandemia, momento cu a cera frontera y no tabatin turista, por a nota cu e planta di RWZI a haya un alivio, pero mirando e crecemento grandi di e sector turistico, e planta no por sigui carga tur esaki y a cuminsa causa mas problema. E planta ta causa molester den e vecindario y ultimo tempo e molester a aumenta aun mas.

Cada aña e holo ta keda bira mas y mas fuerte, te cu turistanan mes ta comenta negativamente ariba esaki y ta vocifera nan propio experiencia desagradabel pa motibo di e problema aki. Na mas di un ocasion e bishitantenan a expresa nan comnetarionan negativo ariba e situacion aki ariba Facebook, den un grupo dedica pa turistanan cu ta bishita Aruba of cu ta bay bishita Aruba. E turistanan ta haci pregunta- y comentarionan y ta duna consehonan pa yuda otro disfruta di nan estadia na Aruba.

E mayoria di e turistanan ta indica cu e holor ta insoportable den e area di e hotel Amsterdam Manor Beach Resort y e restaurant Passions on the Beach, cual a afecta nan decision pa keda na e hotel aki of pa come na e restaurant.

Pa motibo di e problema aki Amsterdam Manor Beach Resort a sufri grandemente. Na varios ocasion e hotel a hiba Gobierno di Aruba corte pa e situacion cu RWZI y e efectonan negativo cu esaki tin riba e hotel. Dia 13 di december ultimo, Corte di Aruba den Prome Instancia a dicta veredicto na fabor di e Amsterdam Manor den e caso na unda e hotel tabata busca compensacion pa daño y perhuicio.

E sentencia di e caso a indica cu Gobierno di Aruba ta completamente na altura cu RWZI no ta funciona manera cu e mester funciona y di e consecuencianan di esaki pa e hotel aki en particular, pero tambe pa medio ambiente y e bario en general. E hotel ta sufri un molester di mal holor y musca cu ta peligroso pa salud di su personal y bishitantenan pa aña y esaki ta e caso definitivamente for di 2002.

Den e sentencia a remarca cu Gobierno di Aruba no a trece solucion- ni inversionnan structural pa RWZI desde e tempo ey, cu a resulta den e condicion deplorabel di e planta awendia y su mal funcionamento.

Cu tur e evidencia cu e hotel a presenta di opinion di turistanan cu a keda na e hotel a logra satisface e hechonan di e criteria pa manda e caso aki pa un procedura pa establece daño manera cu Amsterdam Manor tabata kier.

Na september 2023 Conseho di Minister a aproba e proposicion pa traspasa e operacion y “assets” di e plantanan di RWZI, rioolstelsel y Incinerator pa un subsidiario cu Utilities a lanta. E compania, Aruba Wastewater Sustainable Solutions NV (AWSS), lo ta indrectamente 100% bao di Gobierno di Aruba. E compania aki ya a traha un plan strategico pa termino corto y largo con pa tuma e planta over. E documentonan ta cla pa destaho publico y despues di traspaso mester cuminsa mira alivio mesora.

E “assets” menciona lo wordo traspasa pa AWSS pa un suma total di Afl. 31.8 miyon. AWSS lo paga esaki na Pais Aruba bek den e erfpachtscanon pa un suma anual di Afl. 582.267,51 pa 60 aña, mirando tur e riesgonan cu AWSS ta core tumando e planta aki over.

Pa por haci e trabaonan AWSS lo mester inverti sumanan substancial den un planta nobo y mucho mas grandi, segun e plan strategico pa termino corto y largo. Pa AWSS por haci trabao nan, e mester di entrada. Pa haci esaki posibel lo aumenta e environmental levy, un impuesto cu turistanan ta paga na e hotelnan apart di e toeristenheffing, pa cubri e gastonan.

Na e momentonan aki ta wardando pa e ley wordo trata den Parlamento di Aruba, y pa pasa esaki, pa asina por haci e traspaso di e planta di RWZI y garantisa tambe e entradanan pa e entidad nobo.