Dia Internacional di Baile, tambe conoci como Dia Mundial di Baile ta wordo celebra tur aña riba 29 di april. E dia aki ta dedica na e arte di baile, y ta wordo usa pa promove baile como un balor universal. E dia tambe tin como meta crusa tur barrera politico, cultural, y etnico den e tereno di baile.
E celebracion di Dia Internacional di Baile tin como meta promove baile den tur su forma internacionalmente. Tambe ta educa hende tocante e balor di baile y pa e comunidad di baile por promove nan trabou den un escala amplio. Riba e dia aki, hendenan mester wordo stimula pa disfruta di baile pa nan mes, y comparti e alegria di baile cu otro.
E idea di Dia Mundial di Baile a wordo introduci prome na aña 1982 pa e Comite Internacional di Baile di UNESCO Instituto Internacional di Teatro. E obhetivo principal di e dia aki ta celebra baile, aumenta conscencia tocante su importancia, y stimula hendenan rond mundo pa participa den e forma di arte aki. Dia Mundial di Baile ta wordo celebra den mas di 200 pais rond mundo. Diferente presentacion di baile, tayer, y evento ta wordo organisa pa comunidadnan local y internacional pa promove e dia.
Na Aruba tambe e comunidad di baile ta uni man y hunto ta bay celebra e dia aki. Conhuntamente cu Departamento di Cultura Aruba y Cas di Cultura e diferente scol–, grupo- y academianan di baile di Aruba ta uni forsa pa asina presenta un show di baile pa henter comunidad di Aruba awe 29 di april pa conmemora e Dia Internacional di Baile.
