E siman aki Minister Maduro di Finanzas ta atende e IMF Spring Meetings na Washighton DC y ta haci uso di e oportunidad pa topa cu e representantenan di Reino Hulandes na IMF y na Banco Mundial.
Minister Maduro a bishita Sr. Paul Hilbers kende ta executive director na IMF den representacion di Reino Hulandes. Un reunion den cual e mandatario a repasa e desaroyonan positivo di Aruba y den cual a gradici pa e yudansa tecnico cu Aruba ta ricibi via IMF y via CARTAC cu ta organo Caribense cu ta yuda cu varios proyecto capacitacion.
Minister Maduro a reuni tambe cu Sr. Eugene Rhuggenaath kende ta e Executive Director cu ta representa Reino Hulandes na Banco Mundial. Como cu Sr. Rhuggenaath ta ex-prome minister di Corsou, un parti di e reunion a tuma luga den nos dushi idioma Papiamento. Den e reunion aki tambe Minister Maduro a repasa e desaroyonan mas recien na Aruba y a gradici pa e yudansa tecnico di Banco Mundial. E mandatario a indica cu tin un investigacion riba gastonan di gobernacion, cu debi na prioridad cu mester a wordo duna na ehecucion di e trabaonan pa cumpli cu e Landspakket, ainda ta pendiente.
Ta importante pa e representenan di Reino Hulandes ta na altura di e desaroyonan di Aruba pa asina nan por yuda pa e interesnan di Aruba tambe haya debido atencion den e plataformanan internacional. Aunke Aruba como parti di Reino Hulandes no por haya fondo fia na IMF of Banco Mundial, nos por conta si cu nan experticio y netwerk pa e capacitacion cu ta necesario pa desaroya nos Pais.
