Awe ta tuma luga e siguiente Baki den Bario den Bubali

Despues cu dump di Parkietenbos a cera, e situacion di sushi rond di Aruba a bira hopi precario y un cantidad grandi di dump ilegal a aparece na diferente parti di e isla. Mirando e situacion, e minister encarga, Ursell Arends, a introduci e campaña Limpi Limpi, di cual a sali e proyecto Baki den Bario.

Diferente situacionnan a presenta na final di aña pasa y durante e aña aki relaciona na tiramento di sushi na unda ciudadanonan ta usa containernan di otro persona of instancianan pa tira nan desperdicio personal causando un molester. Den algun caso nan ta hasta tira e sushi na banda di e bakinan di sushi di forma iresponsable.

Baki den Bario ta e oportunidad pa tur ciudadano deshaci di nan desperdicio di un manera responsable y sin susha naturalesa di Aruba.

Na september 2023 a prome Baki den Bario a tuma luga na San Nicolas y a cuminsa na acepta cinco diferente tipo di desperdicio basa riba e tipo cu mas tabata yega na Dump Parkietenbos.

Despues di e prome actividad na San Nicolas, a tuma decision pa pone baki apart pa taira y carton, a cuminsa acepta azeta di cushina usa y a cambia e orario pa un ora mas prome, for 7or di mainta te cu 11or di mainta.

E meta di baki den bario ta pa stimula e habito di separacion di desperdicio den comunidad y e aumenta e cantidad di materia cu ta wordo colecta pa asina di e forma aki e por wordo recicla y procesa debidamente.

Na algun ocasion di Baki den Bario a bin encontra asbestos, cual no ta wordo acepta den e actividadnan di Baki den Bario. Esaki ta pa motibo cu asbestos tin companianan specifico cu tin permiso di DTI pa atende cu esaki cu normanan estricto cu e companianan aki mester sigui.

Segun minister Arends a indica anteriormente den e ultimo censo a constata cu tin alrededor di mil cas cu ainda tin asbesto na nan propiedad cu mester bay wordo atendi cune, pero tin normanan y DTI tin permiso otorga na cierto companianan solamente cu mag di atende cu asbestos.

Pa e motibo aki no ta acepta asbestos durante e actividad di baki den bario, tambe pasobra esaki ta representa un peliger inmenso pa salud di tur esunnan cu ta trahando den e actividad aki.