(AP) – Un cacho blauw chikito cu un accento di Australia a captura e curason di miles di persona rond di mundo.
E ta e caracter principal di “Bluey”, un programa pa mucha cu ta consisti di episodionan di 7 minuut cu a captura e curason di tanto muchanan como adulto. E siman aki a lansa su episodio mas largo, di 28 minuut, cual a genera hopi aprecio pa e show, hasta di esunnan cu no ta mucha ni tampoco un mayor.
“Bluey” ta conta e storia di un blue heeler Australiano, ken conhuntamente cu su ruman muhe (un red heeler yama Bingo), ta nabega su dianan entre cas y scol. E ta un faborito entre muchanan pa su humor, pero tambe ta atrae e adultonan cu ta recorda nan niñez. “Mi experiencia como mucha no tabata e miho y p’esey semper mi a stima programanan unda bida ta bon,’ Miriam Neel, ken ta biba na Colorado a comenta. “E mayornan den Bluey ta motiva imaginacion y creatividad y ta involucra den e bida di e muchanan, y ohala lo mi a tin e experiencianan ey.”
Neel tin 32 aña y a scoge di no tin yiu. E ta bisa cu e programa a bira parti di su rutina tur mainta y hopi biaha su escogencia pa tin zonido rond di dje ora e ta trahando na cas. “Mi no ta bay papia pa henter e generacion, pero hopi ta sinti comfort den programanan pa mucha. Esaki ta loke hopi di nos a crece ta wak,” el a splica. “Y si mi ta bay pasa mi tempo ta wak algo, mi ta prefera wak algo cu no ta bay ponemi sinti miedo di mundo, manera cualkier episodio di ‘Law & Order’.”
“Bluey”, cual awo tin mas di 150 episodio, a lansa na Australia den aña 2018 y a cuminsa riba Disney+ den aña 2020. Tambe el a ser adapta na un serie digital unda fanaticonan famoso manera Bindi Irwin y Eva Mendes ta lesa algun storia popular y un programa live cu ta biaha rond di mundo.
E show tambe a gana varios premio, incluyendo Australian Film Institute Award pa miho drama di television pa mucha desde aña 2019 y International Emmy Kids Award.
E serie ta provee un mucha su perspectiva tocante rutinanan tur mainta y trabaonan na cas mientras tambe ta duna e televidentenan un bista di kico bida ta pa e mayornan via e mama Chilli y e tata Bandit.
E siman aki su episodio final, “The Sign”, ta explora e emocionnan tocante topiconan cu ta resona cu ambos muchanan y adultonan, manera matrimonio, infertilidad, muda di cas y relacionnan despues di divorcio. Ademas di e temanan universal aki, e episodio ta caba e tercer temporada cu regalitonan dedica na e fanaticonan.
Lindsey Schmidt, di 40 aña, a bisa cu e programa su continuidad ta mantene su famia wardando pa mas. “Tin asina hopi referencia na episodionan anterior,” Schmidt, ken ta biba na Ohio cu su casa y 3 yiunan a bisa. “E programanan cu nos ta mira cu nos yiunan regularmente no ta refleha nos bida manera e programa aki ta haci. E cachonan aki ta sinti manera nos.”
E serie a trata varios topico di embehece, morto y crea amistadnan nobo como adulto. Tambe el a introduci un personahe cu tin problema di oido y otro cu ADHD.
Jacqueline Nesi, un profesor assistent di psikiatria y comportamento di ser humano Brown University, a nota cu “Bluey” ta promove regulacion propio y resolucion di conflicto pa muchanan y cria bo yiunan di manera activo ademas di pasenshi pa adultonan.
“Nos ta mira nan surpasa e desafionan cu nos, como mayornan, tambe por ta enfrentando. Na mesun momento, nan ta ofrece un model mas nechi pa diferente habilidadnan ora di cria bo yiu, haci preguntanan habri pa facilita e mucha su creatividad, usa consecuencianan natural ora nan comporta malo, activamente hunga cu nan y laga nan tuma e liderazgo,” el a comenta.
E programa a contribui hopi den expone muchanan na e mundo di animacion, usando diferente estilo manera e episodionan “Escape” y “Dragon”, y un episodio casi sin bos manera “Rain”.
E programa ta credita tambe cu atrae cachonan, y no pa motibo cu e personahenan ta di e mesun especie.
Investigacion ta bisa cu cachonan tin un vision similar na er humano cu no por mira e color cora-berde, cual ta nifica cu nan spectrum di color ta limita na blauw, geel, bruin y cierto tononan di shinishi, cual ta e colornan di e famia Heeler. Tabatin mas mascota cu e nomber di Bluey, Bingo, Chilli y Bandit na Merca segun Rover.
Tur esaki ta nifica cu “Bluey” ta ricibi amor den tur especie, ademas di generacionnan.
