PADF y 131 Aruba a uni pa crea proyecto pa hobennan destaca nan talento artistico y creativo

My Story ta un proyecto cu Fundacion Panamericano di Desaroyo (PADF) ta realisando conhuntamente cu 131 Aruba pa hobennan local y migrante caminda e hobennan ta bay mustra nan talento den pinturanan y tambe den un short film.

Amy Richards, program manager di PADF, a splica cu esaki ta un organisacion humanitario internacional cu ta ricibi fondo di gobierno Mericano pa asina brinda asistencia y ayudo na esnan mas vulnerabel den comunidad.

Pa mas di 60 aña PADF ta den region di Caribe y region di Latino America pa duna asistencia y proteccion pa desaroyo di e personanan cu ta pasando temponan di dificil y pa esaki, Aruba no ta cay afo. Nan ta traha hunto cu oficina di Corsou pa asina provee na otro organisacionnan cu ya caba ta bin haciendo nan trabao di ayudo y servicionan pa yega mas cerca di comunidad.

Richards a expresa cu PADF for di 2021 ta trahando na Aruba pa un comunidad amplio, diverso pero cu un bista special riba migrantenan. Meta di PADF ta pa crea oportunidad pa tur persona, esnan cu tin mas reto, cu ta mas vulnerabel door pobresa of abuso.

Nan tambe ta duna capacitacion na gobiernonan, organisacionnan y beneficiario directo pa asina por salvaguardia y avansa den bida.

Richards a señala cu PADF ta ricibi fondonan di Bureau of Population, Refugees, and Migration (PRM) di Gobierno Mericano y pa cu esaki, cada dos aña nan ta presenta nan call for funding, caminda nan como PADF ta responde y ta splica kico ta e necesidad cu ta biba den comunidad di Aruba, trahando hunto cu oficina di Corsou, y nan ta pasa den e proceso di busca organisacionnan cu tambe mester of por yuda comunidad a traves di nan trabounan y PADF ta financia e proyectonan aki.

Ayera nan a anuncia un proyecto hunto cu nan socio 131 Aruba unda nan ta enfoca riba migracion. E proyecto ta dirigi pa hobennan entre 13 y 16 aña cu un toke artistico y creativo pa stimula entendimento, comprension y compasion entre hobennan local y hobennan di otro nacionalidad cu a bin y haci Aruba nan hogar.

E proyecto nobo hunto cu 131 of Telefon pa Hubentud ta yama “Integrando Horizontes” cual ta enfoca riba comunidad di migrantenan na Aruba. E aña aki nan ta enfoca riba area di proteccion, enseñansa, training vocacional, colaboracion cu gobierno y cu otro organisacionnan, na base di esey nan ta percura pa nan programa ta match cu lo cual ta mira cu ta importante.

Kimberly de Cuba, trahado social di 131 Aruba, a splica cu nan ta un organisacion cu na banda di e proyectonan cu nan mes ta desaroya y implementa, tambe nan tin otro proyectonan pa diferente organisacion internacional aki na Aruba.

Aña pasa 131 a ser acerca pa PADF pa desaroya un proyecto cu ta stimula empatia bao di hobennan local y tambe migrante, pa evita loke ta discriminacion of xenofobia pa un grupo di persona cu ta pertenece na otro rasa, religion, color di cuero, idioma, creencia politico, origen, orientacion sexual, nacionalidad of otro.

Pa e motibo aki, 131 a crea y ta implementando e proyecto “My Story” actualmente na Aruba, esaki ta un proyecto cu ta stimula empatia entre hobennan local y tambe migrante.

“Pa asina reduci discriminacion y xenofobia, danki na e fondonan proporciona door di Bureau of Population, Refugees, and Migration 131 conhuntamente cu PADF por a cuminsa cu implementacion di e proyecto My Story den aña 2024,” de Cuba a señala.

Tambe a informa cu 9 hoben local y 8 hoben migrante ta participando na My Story, e grupo di hobennan migrante ta consisti di hobennan naci na Colombia, Haiti y Venezuela.

My Story ta consisti di 6 seccion, durante seccion uno e hobennan a ricibi un tayer tocante derecho di mucha y igualdad, durante di dos seccion ocho hoben local y ocho hoben migrante a bishita otro su hogar pa asina haya un bista mas profundo con nan ta biba, cu ken nan ta biba y kico nan ta haci den nan tempo liber, cua scolnan nan ta bishita y con nan bida ta en general na Aruba.

Un tayer di actuacion y tambe un di creacion di pintura a sigui den e di tres seccion, den e di cuater seccion e hobennan a crea un pintura cu ta expresa nan experiencia cu nan a pasa door di dje na momento cu nan a bishita e otro hoben, nan sentimento tambe a bin dilanti den e creacion aki.

Despues di e seccionnan aki hunto cu un film coach lo crea un script cu lo ilustra kico tabata e experiencia cu nan a pasa aden na momento di e bishita aki, pero tambe con nan ta mira Aruba pa cu nan, cu e script aki nan lo crea un short movie cu lo ser estrena dia 28 di juni. E mesun dia ey lo tin un exposicion di arte cu e hobennan a crea.

Ademas de Cuba a comenta cu banda di e proyecto aki cu nan ta haciendo nan ta buscando boluntario nobo pa bira un mentor na 131.

Un mentor ta un persona cu ta contesta e-mail, yamada y tambe ta check tur mucha y hoben cu ta contact nan tur dia for di 2 or te cu 6 or di atardi, pa e motibo ey de Cuba a declara cu esnan cu lo kier boluntario y despues un mentor cerca nan por aplica via e-mail 131aruba@gmail.com.

Nan ta invita e persona pa un entrevista y despues nan ta continua cu un training basico cu ta tuma luga na luna di mei y ta consisti di 10 anochi di cual nan ta ricibi 26 module, siguiendo cu 6 ora total di stagiaire, na final e ta bira un mentor oficial.

De Cuba a expresa cu den ultimo 3 aña nan no solamente ta brinda asistencia na e mucha y hoben di Aruba, sino cu tambe nan ta haciendo e servicio aki pa e muchanan di Saba, St. Eustatius y Boneiro y ta importante pa persona domina idioma Ingles di un bon manera.