Awe Minister di Labor, Energia y Integracion, Glenbert Croes, ta den Parlamento di Aruba pa asina duna cuenta ariba su maneho di inmigracion. Esaki ta riba peticion di parlamentario y lider di fraccion MAS, Marisol Lopez-Tromp, hunto cu colega di fraccion Aquannette Gunn y parlamentario di fraccion AVP, Mervin Wyatt-Ras, cu a pidi pa un reunion publico cu minister Croes desde aña pasa.
“Diamars 16 di april porfin minister a haya un buraco den su agenda cu jen di biahe pe bin di transito Parlamento Di Aruba pe reunion publico. Ya ta 1 aña y 2 luna pasa cu nos a pidi pa minister Glenbert Croes bin Parlamento tocante su maneho ineficiente, intransparente y frustrante riba immigracion aki na Aruba. Nos a pidi pa un reunion publico, fei 15 di Februari 2023,” parlamentario Tromp a publica ariba su pagina di Facebook.
Dia 15 di februari di 2023 Lopez-Tromp su fraccion conhuntamente cu fraccion AVP a solicita na presidente di parlamento Edgar Vrolijk pa minister di Labor, Energia y Integracion, Glenbert Croes, asisti na Parlamento di Aruba pa informa e parlamentarionan detayadamente tocante e enfoke pa loke ta trata e politica di inmigracion. “Ta hopi importante pa e minister splica loke ta nifica su enfoke pa tur persona cu di un of otro forma ta depende di e procedura aki, cu durante añanan a bin describiendo como ineficiente, poco transparente y frustrante.” E carta di 15 di februari 2023 tabata indica.
Dia 20 di feburari tambe Lopez-Tromp a reacciona ariba un articulo cu a sali den otro medio di comunicacion cuestionando minister Croes su maneho pa loke ta trata migracion y a base di esey e parlamentario a manda preguntanan por escrito pa e minister concerni pa pidi e reunion pa di cinco biaha y pa puntra na minister di Labor, Energia y Integracion tocante e articulo menciona caba.
“Cuanto bes Minister Glenbert Croes a benta conseho di DIMAS of otro departamento/ directie un banda, y haci loke e kier, esta firma pa cierto permisonan di cual e conseho no ta positivo? Esaki no ta cu DIMAS so sino cu mas departamento/ entidad cu ta resorta bou su cartera. Ki bal tin procedura y ‘good governance code’, ‘vier ogen principe’, ‘depolitisacion’, landspakket cu reformanan, etc., si no ta importa Gobierno manca su mesun ” integridad” gubernamental?” Lopez-Tromp a indica den su publicacion.
Mediante un comunicado di prensa minister Croes a contesta e preguntanan cu Lopez-Tromp a dirigi na su persona y a indica cu el a atende varios reunion di parlamento unda a presenta y elabora riba su maneho, y pues ta considera e critica di Lopez-Tromp como uno sin base.
