Awor cu e temanan regular di maneho gubernamental ta for di caminda pa algun tempo, otro asunto importante pa comunidad por haya atencion. Na e momento aki e asunto cu a capta atencion publico grandi, ta e abuso sexual di menor, e tabu mas doloroso den nos comunidad. Den publicacion reciente a resalta e aspecto cu den gran mayoria di abuso sexual di un menor, e persona responsable pa e acto abominable ta un persona for di seno familiar, o cerca di esaki, por ehemplo un amigo o conoci di e famia. En todo caso, e victima mas tanto conoce esun cu ta perpetra e crimen. Esaki no ta un hecho cerca nos solamente, e ta e realidad amargo den practicamente tur comunidad. Ta trata aki di e tabu principal cu nos conoce den nos comunidad, mescos cu e ta den otro tambe.
Cu esey na ningun momento nos ta desea di sugeri cu, pasobra e ta un fenomeno general, lo por atende esaki cu cierto resignacion. Al contrario, si no ta cuminza papia abiertamente di e cancer moral aki den nos comunidad, nos lo no logra crea un ambiente mas sigur pa nos muchanan por prospera aden. Y lo ultimo cu por permiti ta cu comunidad ta bira complice di e crimennan aki, si no ta haci tur esfuerzo pa mehora e situacion actual. Bisando cu mester cuminza actua ta lanta automaticamente e pregunta, con y unda?
Ta pesey algun informacion general di con e situacion ta necesario, manera el a bira conoci na autoridadnan concerni. Algun aña atras nos a haya e informacion di un persona involucra den nos sistema hudicial, cu e tempo ey, desde 1986, Aruba a registra mas di 6.000 (seis mil) caso di denuncia di abuso di mucha y hoben. Aki mester tuma na cuenta si cu ta trata di tanto abuso sexual como abuso fisico den cual no tabatin un aspecto sexual. Di e denuncianan aki finalmente e casonan cu a yega na corte, pa tuma paso penal contra e abusadornan, ta core den algun centenar. Pues mayoria di caso no tabatin consecuencia pa e abusador, mas tanto pasobra no tabata posible reuni suficiente prueba pa por cuminza e proceso hudicial. Esaki ta keda un di e obstaculonan mas grandi, aunke despues di e terible casonan di abuso y asesinato di dos mucha a tuma lugar un intento grandi pa mehora henter e sistema di intercambio di informacion y coordinacion di trabao. Nos no ta tribi di bisa nada negativo di e proyecto grandi aki, pasobra simplemente nos no sa, ni bon, ni malo.
Riba su mes caba esaki ta un problema, pasobra esey ta implica cu mayoria den nos comunidad tampoco ta na altura. Por ta cu algo a mehora den e trayecto di kico pa haci den caso di un calamidad asina, pero kico ta logrando den preveni cu un situacion ta yega asina leu? Nos tin e impresion cu no tin suficiente inversion haci den atende e asunto aki, ya cu segun nos opinion esey mester encera cu ta cuminza papia abiertamente di e cultura familiar cu nos tin, cu tin varios banda menos positivo. Por ehemplo, den mayoria di famia tin un ambiente positivo unda un mucha ta sinti su mes sigur pa conta su mayornan kico a sucede cune, talvez cu otro persona envolvi? O acaso ainda ta asina cu den hopi famia ainda ta asina cu ‘mucha mester cera nan boca si no a puntra nan nada’? Si te awe ainda tin tanto caso di abuso, cu elemento sexual of no, esey ta un señal cu ainda tin hopi cos pa drecha y cu mehora e trayecto di denuncia y procesamento di keho no ta suficiente.
Nos ta topa aki tambe cu e problema cu den un comunidad chikito, unavez cu algun suceso asina tuma lugar den un famia, masha rapido e famia ta keda confronta cu e hecho cu gran parti di e hendenan cu ken nan ta comunica, ta na altura di loke a pasa. Esey ta conduci na e reaccion di purba tapa e asunto, pasobra enfrenta tur hende, den famia, cu amigo, na scol, trabao, ademas di autoridadnan concerni, no ta nada facil, tampoco den e situacion cu e trayecto di denuncia lo a conoce mehoracion. Tambe mester tuma na cuenta cu ta existi e posibilidad di ruptura dentro di un famia mes, cu por tin consecuencia pa resto di bida di tanto e mucha como e mayornan y demas eventual yiunan. No semper e victima lo conta cu comprension y apoyo den e ambito familiar, pasobra hustamente den caso cu esun cu comete e acto ta miembro di e famia, o hopi cerca di nan, no ta tur lo scoge banda di e victima; tin varios caso unda nos di experiencia propio sa cu a acusa e victima di ta responsable pa por lo menos un parti di e sucedido.
Finalmente, loke ta parce nos importante como prioridad ta cu mester amplia e suministro di informacion na comunidad den tur sentido. Por ehemplo, nos no ta mira publicacion di cifra di cantidad di denuncia, cuanto a yega na procesamento penal, kico ta e obstaculonan cu ta topa den denuncia, y con ta mehora comunicacion den tur ambiente social, na cas, na scol, den deporte, etc. E constatacion cu abuso sexual ta origina mas tanto cerca hende conoci pa e victima, no por keda na un simple grito cu ta bay perdi den silencio, sin cu tin consecuencia.
