Aruba ta ‘back up’ su historia riba The Internet Archive, e prome biaha pa e website di preservacion digital. E Archivo a anuncia dia 8 di april ultimo cu tabata habriendo e portal pa Coleccion Aruba, dunando acceso global pa mas di 100mil documento historico di Aruba.
Segun The Verge, e documentonan ta inclui materialnan cu Aruba a cuminsa colecta bao nos Biblioteca Nacional y archivonan desde cu a bira un pais den Reino Hulandes na 1986.
Segun The Internet Archive, e coleccion Aruba “ta inclui alrededor di 40mil documento, 60mil imagen, 900 video, 45 audio y siete obheto 3D pa un total di 67 (sub)coleccion tematico y/o institucional.” Ademas di agrega tur cos na su propio servernan, e Archivo ta bisa cu tambe ta back up tur cos usando e red decentralisa Filecoin.
Coleccion Aruba ta usa e interface normal di e Archivo, pues bo por busca door di dje, filter pa tipo di documento, y organisa pa aña. Un di e documentonan mas bieu cu The Verge a haya ta e mapa di Aruba di 1974. Segun Wired, e proyecto a cuminsa na 2018 ora Stacy Argondizzo, archivista digital kende su famia regularmente ta bin Aruba cu vakantie, a cuminsa considera yuda e pais preserva su archivonan fisico, cual e tabata preocupa por keda destrui pa clima extremo.
A reporta cu e proyecto tabata complica, pasobra tabata inclui scan “cantidad di toma y corant fragil decadas bieu” como tambe colecta documento cu tabata plama rond mundo (pa motibo di e historia colonial di nos pais) na por ehemplo Hulanda, Spaña y Merca.
Warda e materialnan historico di Aruba ta duna un sabor nobo di significancia na e mision di The Internet Archie pa preservacion digital. E organisacion non profit a keda funda na 1996 pa Brewster Kahle, y te e fecha, tin 99 petabyte di data unico, pues 99mil terabyte.
E archivo tambe tin variedad di cassette VHS, wega di computer antiguo, instruccion pa set di Lego, y post riba Google Plus. Awendia e website ta bao menasa di batayanan legal pa su esfuersonan di preservacion, segun The Verge a nota, manera e veredicto aña pasa cu no por fungi como biblioteca pa e-book y un demanda di industria musical contra e Proyecto Great 78 pa archiva disconan bieu.
Pero The Internet Archive ta un di nos armanan mas grandi ora ta trata di mira historia humano door di imagen, texto, musica y video na un momento unda e internet mes ta cada bes mas dificil pa nabega sin cay den SEO junk y desinformacion.
