Comunidad di Aruba tambe a bisti na blauw pa demostra nan apoyo pa e lucha contra abuso di mucha

Manera ta conoci luna di april ta luna nacional pa conscientisacion y prevencion contra abuso di mucha. Ayera 12 di april tabata e dia special na unda henter comunidad por a bisti na blauw pa asina pone enfasis y demostra nan apoyo den e lucha pa stop abuso di mucha.

Fundacion Mi Voz ta Bo Voz ta conoci pa su trabao pa hopi aña den e area aki, y e aña ki no ta excepcion. Nan ta activo den diferente manera pa yuda aumenta conscientisacion den comunidad ariba e problema aki.

Durante dia di ayera varios persona a haci uso di e oportunidad y a bisti na blauw, e color di prevencion y conscientisacion di abuso di mucha, pa demostra nan apoyo y a pone di nan parti pa aumenta conscientisacion contra abuso di mucha y Fundacion Mi Voz ta Bo Voz, a publica algun di e potretnan aki ariba nan pagina di Facebook.

Segun estadisticonan oficial den 99% di casonan di abuso sexual di mucha, e persona cu ta comete e acto desastroso aki ta un ta un amigo di cas, of amiga of amigo di mama of tata, pareha nobo, door di omo, door di welo, of padrastro. Personanan cu ta cerca di e muchanan y kendenan e muchanan ta confia y personanan cu e mayornan a confia pa laga nan yiunan den nan cuido.

Prevencion y conscientisacion ta algo sumamente importante, sobretodo pa yega mas cerca di e muchanan mirando cu den hopi caso mayornan no ta para banda di e mucha door cu ta un famia a comete e delito horible aki. Esaki, presidente di Fundacion Mi Voz ta Bo Voz, Lisette Gomez, a splica ta comprendible, pasobra e ta haci e mayornan dolor na momento cu un familiar cerca ta mishi cu nan yiu.

Gomes y e fundacion ta sigui lucha constantemente pa haci e muchanan fuerte, mas consciente ariba kico abuso sexual ta y siña nan cu nan ta esunnan cu ta bay para e abuso aki. “Nan ta esunnan u ta bay bisa no, bay cerca un adulto pa meld esaki pa no yega asina leu,” el a enfatisa.

Lamentablemente e tema di abuso sexual di mucha, of abuso sexual en general, ta uno cu ta un tabu ainda den comunidad y ora cu menciona e palabra hendenan ta spanta. Gomes ta subraya cu esaki no mester ta asina. Contrario, hende mester ta mas abierto pa yuda “haci e muchanan fuerte y cu nan por para pa nan mes.”