Director di AZV (y SVb) a tene un rueda di prensa pa duna informacion tocante estado financiero di nos fondo general di gasto di salud AZV. Su conclusionnan basa riba e cifranan general ta loke nan ta: por lo pronto e fondo ta mas cu capaz pa cumpli cu su obligacionnan, y hasta den e añanan aki ta generando un reserva. E periodo despues sin embargo lo mustra otro panorama financiero, loke lo ta consecuencia di e desaroyo economico cu no ta mustra e crecemento rapido cu nos por a mira despues di supera e crisis di 2020/2021. Nos lo bolbe na e aspeto aki, pero antes e stabilidad momentaneo di AZV, cu no a logra solamente cu un biento economico faborable, sino tambe pa medida cu a tuma pa limita – crecemento di – gasto. Esaki tabata encera por ehemplo e limitacion di e lista di medicamento pagable pa AZV, lagando un parti di e medicamentonan prescribi pa e pacient mes paga. Mirando e hecho cu e fondo, entre 2022 y 2023, a logra un aumento fuerte, di prima AZV y BAVP, di alrededor di Afl. 59 miyon (12,1%), e pregunta por surgi cu ta logrando austerizacion fuerte a costo di e cartera di e ciudadano mas vulnerable. Segun nos opinion, no tin estudio disponible di e forma con e austerizacion aki a afecta e pacientnan mas vulnerable, pero lo ta algo cu lo mester tuma lugar. No cu nos tin speranza cu esaki lo sucede, pasobra nos tin un pasado bastante negativo ora ta trata di e tipo di investigacion aki, bao di cualkier gobierno te awe.
Di otro banda, nos ta comprende cu e banda gubernamental lo defende e medidanan tuma pasobra tin acuerdo riba esaki cu Hulanda. Ademas, y esey e director den su rueda di prensa a trece dilanti, ta asina cu tirando un vistazo riba futuro proximo, nos mester ta prepara pa tempo economico menos faborable, unda aumento di gasto, algo imparable na cualkier pais, lo topa cu un crecemento masha limita di e fuentenan principal cu ta abastece caha di AZV, e primanan di dunador di trabao y empleado, y e parti di BBO dedica na AZV (BAZV). Pa 2027/2028, e tempo ‘gordo’ pa AZV (y AOV a proposito) lo ta pertenece na pasado y lo mester planifica con ta bay atende e asunto aki. Naturalmente no ta esey ta loke nos a haya di tende explicitamente den ultimo añanan di banda gubernamental, mientras manera nos medio tabata adverti, esey tabata caba loke e cifranan di gobierno y proyeccionnan di diferente instancia envolvi den planificacion economico, y ‘common sense’ tabata mustra. E recuperacion despues di Covid tabata mustra cifra di crecemento economico hopi halto, pero gran parti tabata pa yega di retorno na unda nos a keda na 2019. A crece mas cu esey caba, pero e crecemento ey lo ta limita, y ta loke e director di AZV den su encuentro cu prensa a indica.
Con atende falta di crecemento: importa trahador
Loke e director no a indica, y esey tampoco ta su prerogativo, ta con nos ta bay prepara pa loke ta bin. Sin crecemento economico no tin aumento di entrada pa AZV, cu gasto creciente di tur manera, ni pa SVb, cu gasto aumentando pa pago di AOV. E contesta di gobierno t’ey caba, aunke nan no ta toca e tema, ainda. Nos ta kere cu no ta mas cu responsable pa sí discuti esaki awor. E ‘solucion’ cu tin na caminda ta e importacion di miles di trahador di exterior, cu ta bay ocupa gran parti di e puestonan laboral den e expansion considerable den cantidad di camber, cu ta bay tin den nos sector di turismo. No tin sentido na e momento aki pa dedica tempo na lamento, e decisionnan ta tuma y e rumbo ta mas cu cla. Importante ta awor kico e conscuencianan lo ta pa, por ehemplo AZV. Cada mil trahador lo significa cierto contribucion na AZV den forma di prima, pero mester tene na cuenta cu e gran mayoria lo ta di salario modesto cu no ta yega na e promedio di gasto pa persona, cu segun e propio relato di AZV pa 2023 a yega na Afl. 4.396 pa persona sigura. Un persona cu, digamos Afl. 2.500 pa luna na salario, ta pone solamente Afl. 2.625, un poco mas cu 50% di e suma anual ey. E resto, nos ta pone… Con e cifranan ta si 5.000 persona drenta pa traha? Nan ta aporta un poco mas cu Afl. 13 miyon, y ta costa nos na AZV casi Afl. 22 miyon. E mesun 5.000 trahador ta duna un aporte na prima di AOV di alrededor di Afl. 18 miyon pa aña, loke ta 6% di e Afl. 300 miyon cu e total di prima AOV lo mester por a yega na 2023. Como agravante: nos ta papiando aki solamente di e cuadro di costo pa esnan cu ta drenta pa traha, no di e fase despues di ‘reunificacion familiar’, pasobra e ora tin mas persona cu ta añadi na e ‘daño financiero’ pa e pais, mientras un so ta paga prima. Despues e otro gastonan ta bin aden, manera den infrastructura y enseñanza, pero esey ta un tema riba su mes. Di e manera aki, nos ta rumbo pa un cierto futuro, unda henter un gobierno no ta conta nos ni mitar di loke ta bay tuma lugar. Y asina nos mester bay vota na 2025, pa un futuro cu talvez nos no por a ni considera, corda acepta conscientemente.
