Recientemente, a traves di su pagina di Facebook e conocido activista Greg Peterson a publica un mensahe lamentable, indicando cu otro tipo di parha na Aruba, e Patrishi a desaperece pa motibo di e actividad turistico di UTV y ATV.
“E ultimo yamada di e Patrishi. Patras di e Faro unda turismo di aventura a causa gran destruccion na un lugar di reproduccion historico di Aruba Burrowing Owl (Shoco), awor tambe nos ta realisando cu e Crested Bobwhite (Patrishi) cu un biaha tabata rondona e area aki den cantidad respetabel, awor a desaparece,” e publicacion ta indica.
Peterson, ken ta un activista cu ta para firme den e lucha pa salvaguardia Aruba su naturalesa y medio ambiente, ta remarca cu pa motibo di e actividad di UTV y ATV,cu ta baha for di caminda, ta haci un impacto serio riba naturalesa di Aruba.
El a subraya cu e tipo di turismo aki no ta sostenibel y mester regula esaki hopi antes cu e causa mas daño na e flora y fauna di Aruba. “E Patrishi ta yamando pa para e locura. Stop e maltrato di bestia na Aruba,” el a enfatisa.
No ta di awo cu ta denuncia e actividad turistico aki. Pa hopi tempo caba ciudadano y organisacionnan ta expresa nan disgusto pa e daño cu e ATV y UTV ta causa na naturalesa, pero asina mes companianan ta keda ofrece excursionnan na turista usando e tipo di vehiculo aki na diferente sitio sin tene consideracion cu e daño cu nan ta ocasiona.
Den luna maart di maart aña pasa, minister di Transporte y Naturalesa, Ursell Arends a comunica cu a tuma e decision pa no otorga permisonan nobo den transporte publico pa UTV y ATV, y tampoco transferi permisonan existente pa UTV y ATV. Asina ta pone un paro na e aumento di UTV y ATV den e sector di transporte publico.
E decision aki tabatin como meta mitiga e impacto negativo di UTV’s y ATV’s riba hende, naturalesa, trankilidad, seguridad y fluho di trafico. Minister Arends a tuma e decision aki a base di conseho di e Werkgroep UTV/ATV cu ta consisti di representantenan di DOW, DTP, DNM, DIP, DTI, KPA, DWJZ, DEZHI y ATA. E decision aki a keda formalisa den e Ministeriële Beschikking di 16 di maart 2023, publica den Landscourant di 24 di maart 2023, edicion number 7. E decision aki ta parti di un maneho mas amplio dirigi riba miho regulacion di UTV/ATV y reduccion di su impactonan negativo.
