Aruba; Ainda un ‘One Happy Island’?

E imagen di Aruba den wowo di nos turista semper tabata cuadra cu e lema “One Happy Island,” apesar cu esaki posiblemente no ta e bista di un local bibando riba e isla. Den ultimo añanan nos a mira varios desaroyo tuma luga na Aruba, cual algun por argumenta di malo pa pio, y esaki ta trece dilanti e pregunta; ainda Aruba ta un ‘one happy island’ pa nos turistanan?

Turismo ta sin duda un di e pilarnan principal y mas fuerte di e isla, cual ta haci cu e bida diario y prosperidad di e isla ta depende riba nos turistanan y e imagen cu nan ta hiba cas di Aruba. Como pueblo, semper tabatin e comprension cu y consideracion di esaki. Sinembargo, tambe tin parti di e pueblo cu ta disgusta cu esaki, expresando cu Aruba ta birando cada biaha mas pa Turista y menos pa e pueblo cu ta biba den esaki.

Segun Banco Central su rapport State of the Economy 2023 pa e prome kwartal di 2023, e resultado di turismo tabata uno solido cu a sigui aumenta crecemento economico, aunke toch modera compara cu e mesun periodo den e aña anterior. Esaki ta sostene e hecho cu turismo ta sigui recupera y ta sigui forma un parti sumamente importante pa e crecemento economico continuo di e isla, cual ta hustifica inversionnan haci pa sigui fomenta e mehoracion y crecemento aki.

Un punto ta permanece ta cu e pueblo di Aruba ta core e riesgo di keda atras y perde su esencia a causa di e gentrificacion cu e desaroyonan dirigi na turismo y turistanan ta trece. Tin parti di e pueblo cu tin e punto di bista aki caba, cual ta sinti cu Aruba cada biaha ta birando mas un ‘mini Merca’ y ta perdiendo loke ta haci e isla ‘Aruba’. Varios ta expresa e opinion cu “San Nicolas ta un di e unico partinan di e Isla unda ainda bo por sinti y mira Aruba.”

Aunke mayoria, of varios di, e desaroyonan hopi biaha dirigi pa mehora Aruba como un producto turistico, tin e posibilidad cu turistanan tambe ta comparti e sentimento di e localnan.

Tin dialogonan cu ta tuma luga riba cierto plataformanan online unda turistanan ta trata un otro banda di e moneda di turismo na Aruba. Mientras e bos cu mas nos ta tende ta esnan cu ta elogia Aruba y ta expresa un amor profundo pa e Isla, tambe tin bosnan cu ta sinti di otro manera. Den un di e plataformanan, cu un comunidad di mas di 10 miyon miembro cu ta trata e topico di biahe, tin personanan cu ta comparti un experiencia diferente na Aruba.

Un di e publicadornan, kendenan tur ta publica di manera anonimo, ta conta cu su persona y su casa a bishita Aruba na fin di nan luna de miel prome cu nan a regresa New England. E ta conta cu e no ta compronde kico di Aruba ta atrae hende, sintiendo cu e no tabatin un personalidad di su mes y tabata sinti manera un version ‘cheap’ di Las Vegas.

Na e publicacion aki, un persona cu a contesta a expresa cu e ta di acuerdo cu esaki. El a comenta cu hopi hende ta “obsesiona cu Aruba y ta te hasta disgusta si bo no sinti mesun cos. Pero compara cu otro islanan cu mi a yega di bishita, e ta esun cu menos mi a disfruta. E cuminda no ta nada miho of diferente cu loke bo por haya na Merca, e awa di lama no tabata asina limpi, tabatin hopi yerba di lama y henter e isla a bira hopi comercialisa.” Otro persona a comenta cu “esaki ta resumi Aruba perfectamente. E no tin caracter. Mi tabata hopi desapunta ora mi tabata core riba caya. Dicon no resalta e cultura local? E ta un isla den Caribe no un isla na e costa di Italia. Tin un comunidad Indigena cu tambe ta forma parti di e region aki, dicon no elogia y resalta esey? No purba di ta algo cu bo no ta,” mientras otronan tambe ta comparti e sentimento, bisando entre otro cu tin un falta di cultura y caracter na Aruba. “E prijsnan ta demasiado halto y e ta complica pa por haci cosnan simpel. E tempo tabata great, e isla ta safe y e awa ta limpi, pero e no ta nada di otro mundo,” otro a remarca.

Un opinion cu a resalta y posiblemente ta un na cual mester presta mas atencion, ta un persona cu a bisa cu su famia a bishita Aruba mas o menos 15 aña atras y nan a stima Aruba, haciendo esaki un di nan vakantie preferi, pero “ultimamente e ta mustra cu bo (e persona cu a haci e prome publicacion) experiencia ta birando lo normal, cual ta hacimi sinti cu mi no kier bay back. Mi ta puntra mi mes si esnan cu te ainda ta stima Aruba ta sinti esaki for di un punto nostalgico y no ta realisa cu e isla a cambia.” Nos turistanan aparentemente tambe ta sinti cu Aruba cada biaha ta cambiando mas y no semper esaki ta un bon cambio, causando cu Aruba ta bira solamente un Isla mas den e monton, perdiendo su esencia como un Isla den Caribe pa bira un ‘mini Merca’.

Cu e varios diferente opinionnan aki, mester tene na cuenta tambe cu posiblemente algun di e personanan aki nunca no a yega di bishita Aruba, sino ta papiando di experiencianan cu otronan a biba of cu nan a tende di dje. Loke si por mira claramente ta, cu tin un diferencia entre Aruba antes y awo, cu ta teniendo un impacto riba nos turistanan y e manera cu nan ta mira, disfruta y papia di nos Isla. Te hasta e cordialidad pa cual e Arubiano ta conoci te kedando atras, notando un falta di esaki den nos generacion actual.

Nos tin cu sigui inculca den nos hubentud y muchanan e cordialidad pa cual nos pueblo ta caracterisa. Turismo ta keda un parti di nos y ta keda den nos man sigura cu esaki ta ricibi e miho representacion di nos pueblo. Como pueblo, nos tin cu trece dilanti nos preocupacionnan y urgi nos gobierno trece back nos cultura y tradicion na nos isla. Por ehempel, urgi e hotelnan pa inclui tur aspecto y parti di nos cultura den nan programa y no solamente carnaval. E ta keda den nos man pa mantene nos cultura bibo y fomenta esaki tanto den nos localnan como nos turistanan, compartiendo cultura y tradicion Arubiano ora cu nan bishita nos isla.

Aruba ta un isla cu un cultura rico y tradicionnan cu ta core den nos sanger y bida diario como localnan. Cu tur e desaroyonan y cambionan cu ta tumando luga na Aruba, tanto localnan como turistanan ta mustra di sinti cu e gentrificacion amplio na Aruba ta causando cu nos ta perdiendo loke como isla ta haci nos unico, pues ban traha hunto pa como pueblo trece Aruba back na loke ta haci nos pais un ‘One Happy Island.’