Mirando cu eleccion lo tuma luga otro aña, por mira cu partidonan a cuminsa move mustrando interes pa pueblo cu campañanan y promesanan, di otro banda, for di eleccion pasa a surgi un partido chikito pero cu ta den boca di pueblo masha hopi mes e cual ta HTC y cu ta buscando candidatonan pa subi riba nan lista, manera su lider Gilbert Webb a sigura den un video recientemente.
El a splica cu su persona for di ultimo eleccion como lider di partido HTC a tuma un pauze di tres aña pa asina ey e por a sigui enfoca den su scol, den un video riba rednan social di HTC, Webb a informa cu awor cu el a haya su MBO den business management e ta duna danki na esnan cu a duna su apoyo na dje y na su partido y cu “awor ta momento pa abo como pueblo ta na prome luga.”
Despues di ultimo eleccion a duna oportunidad pa cada partido cu por a drenta na parlamento y gobierno pa a demostra pueblo lo cual a nan a priminti, si nan lo cumpli cune si of no “HTC te ainda ta para duro cu pueblo merece miho y ta e momento cu mester pone pueblo central y prioridad, mi persona Gilbert Webb, lo participa na eleccion 2025 y HTC ta cu prioridad ta e pueblo,” el a sigura.
Den su opinion, Webb ta enfatisa cu no por ta asina cu tin otro prioridadnan ta poni na prome luga y e pueblo ta sigui sufri “un Aruba unda nos tur ta uni hunto pa paga impuesto continuo ta mira cu hopi cos ta laga di desea, derecho di pueblo ta wordo trapa, prijsnan ta keda aumenta y esnan cu tin cu haci cambio ta sigui disfruta y no ta importa pero ta basta, un Aruba nos ta, un deseo nos tin, ta pa hiba Aruba pa dilanti y pa nos tur ta parti di un cambio di berdad, HTC ta cla pa eleccion 2025.”
Den ultimo eleccion di aña 2021, HTC a participa pa prome biaha cu un cantidad di 6 candidato unda como partido nan haya 249 voto den total y Gilbert Webb como lider a haya 154 voto, e tempo ey nan a señala cu den eleccion aki “hopi cos a bay robes durante conteo, no tabatin camara pa verifica e berdad y a tarda pa manda urnanan aden, y por a reemplasa papel tambe na fabor di esnan presente.”
