Partido RED Democratico a tene un conferencia di prensa diamars ultimo caminda un par di su miembronan, Ricardo Croes, y Rene Kock a trece dilanti varios punto cu e cual nan ta den desacuerdo cu Gobierno di Aruba y ademas nan a papia tocante abuso di bestia.
Ricardo Croes lider di e partido aki, a menciona cu Aruba ta un isla cu ta haya amor di hopi di su hendenan cu tur dia ta lanta pa bay traha y hiba e pais aki bay dilanti, pero na mesun momento tin cierto caos manera trafico, cantidad di accident, hendenan bao influencia di alcohol y cantidad di autonan “si bo tin cu pasa Watty Vos Boulevard y baha Playa, Paradera of Tanki Lendeert despues cu e rotonde, un caos completo pero esey ta djis e prome, pasobra ora bo ta pone atencion bo ta ripara cu e pais completo ta den caos y na final bo ta bisa no trece hende mas, nos no tin luga, tur dia tin problema, hincamento den aeropuerto dilanti turista, accidente di auto cu morto, bringamento den famia, kapmento y asina bo por sigui,” el a sigura.
Tambe Croes a señala cu prome minister Evelyn Wever-Croes ta bisa cu Aruba ta stabiel y Aruba ta bon “pero ora bo ta papia cu e pueblo tur hende ta keha, pa costo di bida halto, pa criminalidad, pero nos gobernantenan ta bisa cu cos ta bon, cos ta asina bon cu nan ta bay bula bay Hulanda sin afspraak, esey ta nos prome minister, pa wak si por haya un descuento di interes di un lening cu el a haci aunke nan a bisele pa no haci’e, pero el a haci’e tog, pasobra esey ta su custumber.”
El a comenta cu tin un partido den parlamento lidera pa Marisol Lopez- Tromp cu manera cu eleccion a caba e problema a cuminsa den e partido “e prome cos cu a bari for di mesa e Gentleman’s Agreement pero den e dianan aki a circula algo otro cu ta hopi pisa mes, esey ta cu un cabayero cu e nomber Groeneveldt, cu su nomber ta circula formal riba Facebook e cual ta un ex-candidato di MAS cu awe por ta un parlamentario sinta eyden cu ta tuma decisionnan, un burdugu completo cu a abusa di un bestia di un forma cu mi ta puntra mi mes, cu ki sorto di screening e persona aki a pasa pa por subi riba lista di e partido ey mes? Aworaki el a core y sali for di partido pero esey no ta kita cu awe e persona aki por tabata un parlamentario,” Croes a declara.
Na mesun momento, el a sigura cu tin leynan cu no ta wordo ehecuta manera mester ta como por ehemplo, e ley di cacho cu tin “y cu no ta sirbi pa nada tampoco, pasobra tur esnan cu tin conocemento di e ley aki, entre otro, ley ta bisa cu pa bo tin un Pitbull bo mester un permiso di minister y e ley aki a bin na vigor, sin cu ni un hende a haya e oportunidad pa bay inscribi of pidi un permiso pa tin un cacho manera un Pitbull, pero multa hende cu ta tribi di duna cacho un tiki cuminda pasobra nan a tira e cacho den bari cu tin cu malesa y nos ta haya duele di dje, nos ta hende di compasion, ta haya multa, polis ta yega na un forma masha arogante cerca hende grandi pa bisa nan cu nan ta haya multa pa duna e cacho cuminda.”
Ademas, Croes a haci un yamada na tur esnan cu a haya un multa asina aki pa no page pa motibo cu e ley no ta sirbi, e derecho ta entre otro, pa e ley ta miho hinca den otro y ehecuta manera mester ta, e obligacion ta pa respeta e bida di tur bestia “y a bo cu a postula bo mes pa politico pa carga un di e responsabilidad mas importante di e pais aki ta permiti e cosnan aki.”
Pa minister di Integridad, Naturalesa y Asuntonan di Adulto Mayor, Ursell Arends, Croes a manda un mensahe indicando cu “Ursell scucha, bo gobierno ta stabiel te ora prome minister ta haci ‘bep bep’ anto e ora ey bo ta bay mira con instabil e ta, pasobra esey ta prome minister.”
Den su opinion, Croes ta comenta cu e situacion no por sigui manera cu e ta y a puntra “kico bo ta bay warda pasa, eleccion pa haci kico? Vota berde of geel? Atrobe? Cu tur e caos cu tin?”
Di su banda, Rene Kock a trece dilanti su punto di bista tocante abuso di bestia, algo cu nan pa nan no ta aceptabel y nan no ta bay acept’e nunca “mi ta urgi esnan competente pa tuma un accion contra esaki pasobra e no ta manera con bo ta trata un bestia y si bo no por cuida un bestia, please no busk’e, ni cumpr’e pasobra nan tambe ta merece cariño y respet,” el a bisa.
Tambe, Kock a comenta cu tin un ronda di consulta pa loke ta trata ley di naturalesa cu minister Ursell Arends ta haciendo impulso di dje pa por crea e ley aki, pa Kock e accion di proteha naturalesa ta contrario na loke minister Arends ta haci “ta completamente diferente” manera el a sigura.
“Mi tin e concepto akinan unda e ta bisa kico ta e consideracionnan cu nan ta bin cu e ley y te ora mi ta puntra mi mes, poco tempo pasa despues di 75 aña el a dicidi di introduci e lora back den e fauna di Aruba, e ora mi ta puntra mi mes den e reglanan cu el a pone, si el a haci un estudio, si tin cuminda pa e loranan aki of e ta bay pone nos prikichi bao un presion enorme pasobra nos sa cu un lora cu prikichi ta come e mesun cuminda y awor mi kier bay back den historia cu minister kier pa e lora y e prikichi disparce.” Kock ta señala.
Pa Kock, e ley pa derecho di naturalesa ta hopi bon, pero accion di minister cu e ta haci e ta laga tur esaki pasa cu tur e camber extra cu nan a acepta pa construi “cu e no a para nan y bisa ley di naturalesa ta bisa esaki.”
Pa finalisa, Kock ta cuestiona cu a cera un dump sin tin algun plan manera el a expresa y cu awor a crea un otro na caminda di Barcadera cu ta causa basta mal holo “y e ora ey e ta bisa no, nos ta pro naturalesa.”
