Ariba su pagina oficial di Facebook Bureau City Inspector (BCI) a haci un recordatorio na tur ciudadano cu ta transporta sushi den baki di pick up, pa tapa esaki cu lona pa no ocasiona mas sushedad rond di Aruba y evita boet.
“Departamento di BCI ta bolbe manda un mensahe pa tur e contratistanan cu ta transporta desperdicio (sushi), resto di mata of cualkier otro artefactonan, corda mara nan bon y pone un lona pa tapa nan completo. Tene cuenta cu bo por haya un boet pa e acto aki. Evita esaki y pone bo lona,” BCI su publicacion ta indica.
Ta existi un cantidad grandi di autonan, pickup, trucknan cu ta transporta sushi, tera, mata, sin tapa esaki debidamente. Den landsverordening, Articulo 17b ta indica cu ta prohibi pa transporta puin, afbraak, kalk, klei, mest, zaagsel, krullen, zand, spaanders, los stro, pakhooi, pakpapier, as, slijk, sushi of cualkier otro obheto of stof sin cu ta tapa debidamente den un medio di transporte, pa evita cu e desperdicio cay of bula afo.
Esaki ta nifica cu si un persona ta transporta desperdicio, mester tin un lona pa tapa e baki di e pickup of trailer completo cu nada por sali afo of bula. Esunnan cu no lo cumpli cu esaki por haya un boet y por bira un acto castigabel.
A pesar di esaki ainda tin hende cu no ta haci caso na e normanan aki ta transporta nan desperdicio of sushi sin cu ta tapa esaki debidamente.
Manera ta conoci Aruba ta lidiando cu un problema basta serio di sushi cu dumpnan ilegal cu ta aparece na varios parti di e isla. Hendenan iresponsable ta prefera di tira nan sushi unda cu ta, susha Aruba su naturalesa sin tene ningun tipo di consideracion ni respet pa e ley y normanan cu tin na luga pa mantene Aruba limpi.
