For di inicio cu e Pop-Up Market aki a wordo anuncia gran mayoria di bishitantenan a haya esaki un super bon idea. Esaki ta duna espacio pa nos productornan na momento cu tin produccion nan por ofrece esaki na e clientela. E clientela mes tambe a haya esaki cu a cay den bon tera pa motibo cu nan ta haya e chens di bin bishita Santa Rosa y probecha di cumpra cualkier producto fresco den nos Pop-Up Market. Mas ainda cu e ta tuma lugar cu un poco mas frecuente cu e acustumbrado Mercado Santa Rosa.
Pop-Up Market tin menos preparacion, practico y dunando e mesun resultado cu e mercado. Bishitantenan ta hay’e mas facil di pasa cumpra y sigui pa e otro puntonan di benta di productonan fresco manera na STR Agriculture situa na Altovista of tambe na Yara caminda ta situa 297 Farm. E dos localidad nan aki practicamente tur diasabra tin productonan fresco tambe pa ofrece na e pueblo di Aruba.
Den e corto tempo cu e Pop-Up Market tin ta tumando lugar el a haya un acogida bastante popular entre nos bishitantenan cu ta duna comentarionan hopi positivo. Mester menciona si cu tur cos ta basa riba produccion local. Logicamente si tin produccion local tin producto fresco pa ofrece den nos Pop-Up Market.
Diasabra awo 6 di April bo ta cordialmente invita pa haci nos un bishita y bin disfruta di nos Pop-Up Market caminda tin varios producto fresco pa ofrece na nos clientela di nos productornan local. Nos ta cuminsa for di 8’or y ta continua te cu 11’or di mainta.
Nos ta haci un apelacion tambe na otro productornan cu kisas cu ainda nos no a yega cerca nan pa por tuma contacto di Santa Rosa ta telefon 585-8102 dado caso cu bo tin producto fresco pa ofrece pa asina abo tambe por haya e oportunidad di participa den nos Pop-Up Market. Nos ta consciente tambe cu hopi di nos productornan local den mayoria caso ta sali for di nan produccion hopi lihe sin mester di participa den nos Pop-Up Market of Mercado. Nos ta hopi contento di tende esey y por mira cu tin demanda pa mas produccionnan fresco local pa ofrece na e pueblo di Aruba.
