Diadomingo ultimo riba rednan social, e pagina Parkietenbos Stories a publica un carta di minister di Naturalesa, Ursell Arends, dirigi pa director di Dienst Openbare Werken (DOW) Marlon Croes, tocante trabaonan di preparacion di kimamento di desperdicio den aire liber na Parkietenbos como solucion “temporal” na e situacion di emergencia, un carta cu a causa conmocion pa algun ciudadano concerni cu ta biba den e bisindario.

Den e carta, cual tin fecha di 14 di maart 2024, ta duna informacion tocante e solicitud pa permiso pa kima sludge, desperdicio medico, carcas – considera como “kritische afval” – cu ta almacena den e nave industrial di Parkietenbos, pa e proposito y e fin di mitiga e aumento di riesgo pa salud publico y medio ambiente y asina permiti e recuperacion di RWZI.

E documento ta informa cu varios reunion a tuma lugar cu tur stakeholder involucra, na unda a reconoce cu e utilisacion di “open air curtain burner” ta e unico solucion (temporal) pa e situacion di emergencia, pero pa un tempo limita y pa procesa e excedente di desperdicio. “Ni e situacion ni e solucion aki ta deseable, pero si necesario pasobra ta parce cu no tin otro alternativa den corto plaso.”

Despues di consulta cu minister di Infrastructura y minister di Salud riba e situacion cu a surgi y e necesidad di stabilisa e situacion akinan, “mediante e presente mi ta duna mi consentimento pa haci e trabaonan preparatorio relaciona cu e uso temporal y condicional di e dos open air curtain burner na Parkietenbos,” e carta ta señala.

Igualmente e documento ta continua bisando cu en bista di lo anterior y di e declaracion di GEA di 6 di december 2023, y cu enfasis den e hecho cu Parkietenbos ta cera pa procesamento di desperdicio diferente na incinerator, “mi lo kier proporciona lo siguiente prome cu lo tuma luga e formalisacion necesario pa inicia e kimamento na Parkietenbos:

“Mi ta spera mi por haya for di su persona un asesoria detaya tocante e duracion di e actividad aki y e costonan operativo y mi ta pidi pa tene na cuenta e siguiente comentarionan y condicionnan: e solicitud di dispone di 20% di e tereno pa uso di dos container cu un superficie maximo combina di 40 meter cuadra ta parce excesivo y mester di hustificacion.”

Condicionnan
 Uso di open air curtain burner ta un solucion temporal y ta permiti pa un periodo di dos luna, por extende hasta un maximo di 8 luna, ta sigui busca alternativa den e dos luna ey.

Extension ta depende di e resultadonan di implementacion.

Implementacion ta coordina y monitoria pa Serlimar, Departamento di Salud Publico (DVG) y DNM, mester sigui instruccion di nan na tur momento.

Acuerdonan relativo na implementacion di e medida di emergencia aki ta bay registra den un protocol cu opinion di Serlimar, DVG y DNM.

E protocol ta bay inclui den tur caso aspectonan tecnico y di higiena, normativa di funcionamento y tur e normanan cu lo adopta riba posibel molestia ocasiona, tumando na cuenta e direccion di biento, capacidad di e open air curtain burner, etc.

Implementacion di medida di emergencia no por obstaculisa e planificacion di proyectonan di saneamento pa Parkietenbos cu ta bay cuminsa e aña aki.

Kimamento ta realisa di acuerdo cu un cronograma mensual acorda cu Serlimar, DVG y DNM.

Ta bay kima solamente desperdicio considera como kritische afval, sludge, desperdicio medico, carcasa, droganan ilegal, entre otro.

Mester establece un plan di accion cu especificacionnan tecnico riba e volumen actual, capacidad di procesamento diario y calculo di duracion.

DOW ta bay informa riba avancenan na Serlimar y minister di Naturalesa a traves di rapportnan mensual.

Ta bay informa na publico y bisiñanan di e luga mediante informacion prome cu lo cuminsa a trabounan, un orario di uso pa open air curtain burner cu condicionnan detaya den dje.

Ora DVG y DNM declara e situacion stabiel, e kimamento lo stop.

Pa finalisa, e carta firma pa minister Arends a indica cu “uso di open air curtain burner” den aire liber ta un solucion di emergencia y no ta altera e hecho cu mester haci tur esfuersonan posibel pa por utilisa e incinerator.

A destaca e urgencia di logra un medida provisional. Tambe a señala varios biaha cu a yega momento di cuminsa combersacionnan entre DOW y Serlimar tocante e transferencia gradual di e gestion di incinerator.

Parkietenbos Stories: “Violacion di reglanan di ICAO cu ta protege siguridad y calidad di aire”

Mientras tanto, riba e Facebook page Parkietenbos Stories a comparti e carta aki cu e comentario den cual ta haci un yamada pa respeta e regulacionnan di ICAO na Parkietenbos.

“Ta rekeri atencion internacional inmediato debi na un menasa ambiental critico na Parkientenbos, autoridadnan a aproba uso di open air burners pa eliminacion di desperdicionan, contradiciendo directamente regulacionnan di ICAO (International Civil Aviation Organization) y mandatonan ambiental di Nacionnan Uni. E decision aki ta pone den peliger ecosistema vital di mangelnan, bida marino, salud y siguridad di comunidad local incluyendo muchanan.”

Ademas, nan ta señala cu “nos ta buscando urgentemente apoyo di ciudadanonan rond di mundo, organisacionnan ambiental y defensornan di derechonan humano pa expresa nos den contra di esaki: e luga eligi pa kimamento ta peligrosamente cerca di aeropuerto, de un claro violacion di reglanan di ICAO cu ta protege siguridad y calidad di aire. Ademas, e decision ta ignora descaradamente e rapport di PAHO di 2018 cu ta desconseha practicanan peligroso.”

Pa finalisa nan ta indica cu “e mesun minister, responsabel di defende integridad, awor ta pasa por halto e leynan critico y di salvaguadia ambiente esencial. No a duna ni un permiso pa molester, loke ta ilustra e desprecio pa protocolnan legal y etico,” nan ta declara.

Minister Ursell Arends : “Mi no lo coopera pa kimamento habri na Parkietenbos”

Redactor di Bon Dia Aruba a tuma contacto cu minister encarga cu Medio Ambiente pa asina e por duna mas informacion tocante esaki na unda ayera el a declara lo siguiente:

“Na november, e incinerator a daña. Desde e momento ey locual nos ta yama kritische afval cu ta carcas, desperdicio medico, y e sludge a cuminsa wordo acumula. E decision di corte a bin como extra reto paso a pone [medida] pa no usa e inicinerator mas. E cantidad di desperdicio acumula a yega na un punto cu mester tuma un noodmaatregel. DOW a haci peticion pa usa open air curtain burner como unico alternativa. Na e momento di e carta esaki tabata e informacion conoci. Mientras tanto otro informacionnan a yega na nos conocemento cu SI tin mas alternativa. Nos ta bezig cu preparacion pa esaki y lo comunica esaki na su debido tempo. Un cos ta sigur: mi no lo coopera pa kimamento habri na Parkietenbos. E plannan pa restauracion di e area ta den pleno fase di ehecucion caba.”

Ademas, el a sigura cu e “incinerator mester pasa den e proceso di hindervergunning full di nobo pa e por opera back. Esaki lo dura algun lunanan.”