Den dianan aki, un caso severo di maltrato di cacho a shock comunidad caminda abuso di bestia ta un problema hopi grandi cu ta sigui permanece na Aruba lastimamente, fin di siman ultimo a bira conoci e nomber di e persona ken supuestamente ta e responsabel di e maltrato na Khaleesi, e cacho di cual su potretnan a bay viral door di e maltrato cu el a sufri y cu a muri dialuna ultimo.

Diamars di siman pasa, un publicacion di Luna Foundation Aruba Inc. a causa hopi conmocion den comunidad. Tabata trata di un potret hopi sensitivo cu a bay viral, unda tabata ilustra e situacion di un mama cacho y su puppies. “Den e añanan cu nos tin yudando e bestianan nunca nos a yega di mira un situacion asina horibel,” e publicacion tabata indica.

Un di e potret tabata di e mama cu tabata mara na un palo y e puppies band’i dje. Ademas tabatin otro potret mustrando tal maltrato, cu niun hende por a compronde con e maldad di ser humano por yega asina leu cu un bestia.

Inmediatamente a logra rescata tur di nan y hiba nan na veterinario pa asina por logra rescata e bida di e mama, cu ta esun di mas afecta pa loke e tabatin mara na su nek, cu a causele hopi daño mes.

Sinembargo, tur ayudo, esfuersonan y lucha no tabata suficiente pa Khaleesi por a sobrevivi y dialuna ultimo el a fayece.

Zoey Conijn Berkel di Luna Foundation Aruba Inc. a conta Bon Dia Aruba cu inicialmente nan a bay warda di polis na Wayaca, unda nan no a logra entrega nan keho. Sinembargo, otro recherche, di ken nan a ricibi bon atencion y trato profesional, a dirigi nan na polis di bario. Aki si nan a logra entrega nan keho, y polis di bario ta bay atende e caso. Conijn Berkel a indica cu ta bay usa e caso aki pa conscientisa, paso casonan asina ta sucede demasiado frecuentemente.

Cuestionamentonan a surgi riba rednan social na unda hendenan a tag tanto prome minister Evelyn Wever-Croes y minister Ursell Arends pa tuma accion den caso aki, y unda tambe a bira conoci e nomber di e persona ken supuestamente ta tras di e acto di maltrato horibel aki, A.G., un ex-politico riba lista di MAS y actual planificador di boda, unda hopi usuario riba rednan social ta bin papiando di dje y hasta menasa a cay.

Mientras tanto, Zoey Conijn Berkel den un Facebook Live a menciona cu su fundacion ta pa yuda bestianan y cu nan no ta sostene violencia. “Nos tin cu educa e isla lo miho posibel, no ta trata di duna un cacho awa y cuminda so, ta trata di duna compasion, empatia y stim’e cu tur nos curason.”

Di su parti, minister Ursell Arends ayera riba su red social a informa cu “ta sigur cu nos no lo permiti pa e dolor y morto di Khaleesi bay en vano. Combersacionnan a bin ta tumando luga y nos a ricibi confirmacion cu KPA y OM ta bezig cu e caso.”