Ayera atardi pa 5or aproximadamente, diferente medionan social a reporta e ceramento di caminda rond di aeropuerto, na unda a reporta un melding di un avion cu tabatin problema pa aterisa. Minuutnan despues, e avion a logra baha den e pista di aterisahe sin problema, cu 171 pasahero abordo.
Segun loke reportero di Viral 297, Baboe Hoek, a informa ayera mientras e tabata presente na e luga, tabatin presencia di Cuerpo di Polis di Aruba, Cuerpo di Bombero y otronan cu a cera caminda rond di aeropuerto pa motibonan di seguridad.
Por a compronde cu tabata trata di un avion, cual tabata pertenece na aerolinea Delta Airlines, cual tabata confrontando problemanan tecnico. Mientras tanto, e avion tabata bulando rond di Aruba y ora e pilotonan a haya e señal ‘clear’, nan a logra baha cu 171 pasahero.
Segun vocero di aeropuerto, ken a manda un comunicado pa medionan local, a splica cu “debi na problemanan cu motor di vuelo 581 di Delta Airlines na salida di aeropuerto, AUA a activa un emergencia total y a cera temporalmente pa precaucion di siguridad. E avion a aterisa di manera sigur y pasaheronan tabata atendi pa e aerolinea, ta bay somete e aeronave na un inspeccion profundo di parti di autoridadnan.”
