Ayera 18 di maart Aruba a celebra su dia nacional, Dia di Himno y Bandera. Cu un amor comparti pa Aruba y su simbolonan patriotico, varios grupo di servicio y sociedad civil a tene diferente actividad pa asina celebra, y manera ta custumber pueblo a sali pa disfruta di e diferente actividad cu ta ser organisa rond di e isla.
Actividadnan a cuminsa diadomingo anochi cu manifestacion cultural ariba Plaza Libertador Betico Croes unda gruponan musical, gruponan di baile, cantantenan y demas artista a deleita e publico presente cu diferente presentacion cultural.
Ayera mainta e actividadnan a cuminsa cu e Acto Protocolario dilanti Plaza Libertador Betico Croes na unda diferente organisacion, fundacion y grupo a participa den e desfile pa representa nan grupo dilanti su excelencia Gobernador di Aruba, ministernan y publico presente.
Di mainta te anochi, for di San Nicolas te na Noord, tabatin un cantidad di evento- y actividadnan pa ciudadanonan celebra e dia nacional y disfruta di e cultura di Aruba.
Pabien Aruba!
