Cada biaha mas y mas propietario di casnan ta scoge pa drenta den e negoshi di huur nan propiedad como vacation rental. Inicialmente e fenomeno aki tabata sucede na cierto partinan di e isla, por ehemplo Palm Beach cu ta e area turistico, pero recientemente esaki a expande y aworaki propietarionan di cas na tur parti di e isla ta prefera di no huur nan propiedad na localnan pa tempo largo, pero mas bien pone nan cas disponibel pa turistanan.

Ta e caso cu ta sucediendo cu un ciudadano local cu den buskeda di un cas pa huur. E persona aki ta conta cu el a tuma contacto cu dos persona cu tin cas pa huur pa asina wak e posibilidad di huur un di nan. Pero despues, el a ser informa, pa ambos doño cu nan a tuma decision di mas bien inverti den e casnan, pa haci remodelacion y huur e casnan na turista como vacation rental.

Scarsedad di vivienda ta problema cu ta birando mas comun y grandi, apart di un otro problema cu ta biba den comunidad, cu ta e prijsnan haltisimo di e casnan disponible pa huur, y pa cumpra, ya cu prijsnan aworaki ta lista na dollar, y no na florin. Mester agrega na lista aki tambe e problema di casnan di vakantie cu ta opera di forma ilegal.

E topico di vacation rentals ta un tema cu a bin den discusion na varios ocasion, y tin diferente estudio realisa ariba e tereno aki. Den luna di januari Aruba Tourism Authority (ATA) a publica e resultadonan di un estudio cu nan a realisa ariba short-term vacation rentals.

Esaki ta un estudio cu ta inclui inventario di condominio existente y condominio cu actualmente ta na caminda pa realisacion, y un lista actualisa di lugar di estadia cu no ta un hotel, pero cu si ta disponibel pa e turista cu ta keda na Aruba pa un corto tempo. E resultado di e estudio ta menciona cu den totalidad Aruba ta conta cu 3,748 unidad di Short-Term Vacation Rentals activo cu ta carga un capacidad di 17,321 persona.

Den luna di mei 2023, minister di Economia, Comunicacion y Desaroyo Sostenibel, Geoffrey Wever, a presenta e resultado di un estudio realisa pa Economisch Bureau Amsterdam ariba e impacto economico di vacation rentals na Aruba.

Minister Wever a indica cu e necesidad pa e estudio aki tabata basa riba e hecho cu cada cas cu wordo ofreci como vacation rental ta nifica cu tin menos cas pa e propio localnan. Ademas di esaki e cantidad di casnan pa localnan ta baha door cu personanan cu no ta biba na Aruba ta cumpra casnan den zona residencial cu e meta di haci esaki un vacation rental pa turista. Cu menos cas obtenibel door di e desaroyo aki, pero cu un demanda grandi pa cas e prijs pa cas ta sigui subi y bira impagabel pa e ciudadanonan local.

Mirando e problema cu esaki ta causa den comunidad, un scarsedad grandi di vivienda social y general, prome minister Evelyn Wever-Croes, como minister encarga cu infrastructura, a reuni cu e departamentonan encarga, hunto cu FCCA, como fundacion encarga cu construccion di viviendanan social, pa aborda e problema aki.

E mandatario a remarca cu un di e retonan cu ta contribui na e problema di scarsedad di vivienda pa local ta cu hopi di e casnan ta wordo bendi na stranheronan cu ta paga hopi placa pa nan. “Esaki a distorsiona e mercado, aumentando e balor di e casnan exageradamente, conduciendo asina cu hopi hende no ta bin na remarca pa cumpra of construi un cas,” el a indica.

Apart di esey, el a menciona cu un di e retonan grandi cu ta contribui na e problema ta e disponibilidad di tereno na Aruba.

Pasando den e problema aki na e momentonan aki, e ciudadano, inicialnan R.M., ta conta cu e ta un reto grandi berdad pa haya cas, teniendo na cuenta tur gasto cu ta bin cune.

“Nos ta un famia di cinco hende locual kiermen cu nos mester un cas di minimo dos camber, preferiblemente tres camber, pero e prijsnan ta hopi halto. Apart cu casi no tin cas disponible. Nos a tuma contact cu dos persona cu tin nan cas bashi y cu tabatin pensa di huur e casnan, pero despues nan a tuma decision pa no huur e cas na local, pero mas bien na turista,” el a indica.

El a sigui conta cu solamente e hecho cu mester paga minimo tres mil florin pa drenta un cas, ya caba ta un reto grandi, sin conta cu mester paga tur servicio, ya cu hopi di e casnan no ta inclui ningun servicio. El a señala cu algun ta inclui tal bes internet, cable y servicio di piki sushi, pero hopi aworaki no ta inclui ni e servicionan aki.

E ciudadano aki a splica cu e opcion di cumpra cas tambe ta un reto. E casnan cu tin disponible, mayoria no ta accesibel pa un famia local, ni cu dos salario. “E casnan ta ridiculamente caro, e prijsnan ta den dollar tambe, no na florin y e casnan cu tin e prijsnan mas economico ta casnan cu ta no ta 100% den condicion, nan ta “fixer uppers” cual na final ta sali hopi mas placa pasobra mester hinca placa aden pa drech’e,” el a bisa.

El a agrega cu cumpra tereno tambe ta un opcion, pero hasta terenonan aworaki tin prijsnan basta halto.

E fenomeno di vacation rentals, manera estudionan ta señala, ta aporta na e crecemento economico di e pais en general, pero na mesun momento e ta afecta fuertemente e cartera di e ciudadanonan local.