Minister di Transporte, Ursell Arends: “No tin espacio pa cumpra vergunning di taxi mas”

Den edicion di Bon Dia Aruba di diaranson ultimo, a publicoa un post cu ta trata tocante permiso di taxi caminda a trece dilanti e problematica di compra y benta di permiso di taxi, redactor a puntra minister encarga di e cartera di Transporte, Ursell Arends, kico nan ta haciendo na e momentonan aki cu esey.

Ta asina cu riba rednan social un post di un persona cu tabatin e interes di cumpra un permiso di taxi a hala atencion di varios usuario, maske esaki ta algo cu ta contra ley y no mag di bende permiso di e forma aki, toch tin hende cu ta sigui busca e manera “mas facil” di por cumpra un permiso di taxi.

Pa esaki, minister Arends a menciona cu ora el a bira minister di Transporte el a trek in e maneho cu tabatin door di e minister anterior e cual tabata haci posibel pa cumpra permiso, “nos a bay back na loke ley ta prescribi y aworaki e posibilidad pa cumpra un vergunning , esey no ta posibel mas, nos a minimalisa tur e loop-holes y na e momentonan aki nos ta den proceso pa bay presenta e maneho nobo y esey tambe lo duna perspectiva y indicacion unda nos ta bay cu maneho di transporte na Aruba,” el a bisa.

Ademas, ademas el a conta cu ora el a bira minister el a confronta casonan specifico caminda cu hendenan ta yega na su ministerio bisando cu nan a paga pa un inscripcion pa permiso di taxi “pero e maneho temporal cu a ser implementa door di e minister anterior tabata permiti esey, nos a stop e maneho ey, na e momentonan aki nos a minimalisa, no na 100%, pero nos a minimalisa e posibilidad cu un hende por cumpra un taxi vergunning y na final di dia e proceso aki tin cu pasa den un canal formal,” el a menciona.

Tocante esey, e mandatario a splica cu e persona ta yega na Departamento di Transporte Publico (DTP), despues DTP ta manda e conseho na su ministerio di Transporte y na su ministerio su huristanan ta evalua esey, un bes cu e tin e ‘green ligth’ di abogadonan e minister ta firma e permiso pa taxi.

Nan tambe a haci un proceso di limpiesa di tur e permiso cu a otorga den pasado y na e momentonan aki nan ta den dialogo cu Departamento di Impuesto pa finalisa e cantidad permisonan tambe cu lo bira liber y kisas den futuro lo por otorga.

“Mi tambe ta tuma nota di tur e rumor di vergunning cu hendenan ta cumpra pero na e momentonan aki mirando cu nos ta a tene nos mes na e ley di Transporte Publico, mi ta convenci cu no tin espacio pa cumpra vergunning di taxi mas,” el a finalisa.

Tocante e articulo reciente di Bon Dia Aruba, esaki a haya basta reaccion di usuarionan di rednan social caminda nan a expresa, por ehemplo, “No ta permiti bende vergunning mas. Gobierno a stop e cos ey hopi aña atras. Ni por pas’e pa famia mas tampoco segun mi. Ora e persona no ta/por core taxi mas, gobierno ta trek in e vergunning y duna otro hende cu a aplica y ta riba wachtlijst pa haya.”

Otro usuario a reacciona ariba e comentario aki indicando cu e practica di pasa un permiso di taxi pa otro famia si ta tuma luga ainda. “Por pas’e pa famia ainda, bende si no mag bende mas, unless bo ta friends and family,” el a remarca.

Un usuario a cuestiona kico ta e contesta corecto pasobra “caya ta papia” cu ainda tin hende ta bende permiso y te hasta tin areglonan di “huurkoop” ta tuma luga cu e permisonan di taxi.

E ocupacion di taxista na Aruba ta uno hopi yamativo mirando e cantidad di bishitante cu Aruba ta ricibi, e cantidad placa cu nan ta gana y “flexibilidad di e trabao” ya cu e taxista mes ta dicidi e orario cu nan ta traha.

Na mas di un ocasion personanan interesa den cumpra permiso di taxi sa bin pa dilanti puntrando tocante esaki y aunke legalmente esaki no ta permiti mas, tin indicacionnan cu tin hende ta haci e tipo di negoshinan aki ainda “bao mesa”.

Algo cu ta hiba na un otro problema, taxinan pirata. Un fenomeno cu segun minister di Transport a indica den pasado, nan ta atende cune, pero cu ainda tambe ta sucede.

Te cu november aña pasa, segun minister di Transport a indica, tabatin un total di 465 permiso di taxi, y segun el a indica e intencion ta pa aumenta e cantidad di permiso cu ta ser entrega, mirando e cantidad di hotelnan nobo cu lo habri na e isla.

E tempo ey, tambe e ministerio a lansa un formulario digital pa esnan cu a haci peticion pa permiso di taxi den pasado, pa asina por confirma nan interes riba esaki, e meta di esey tabata pa centralisa e peticionnan bou di DTP, pa yuda trece mas structura y claridad den e proceso di peticion di permiso, e formulario a keda disponibel te cu 1 di februari ultimo.

Minister Arends a enfatisa cu e formulario digital ta disponibel solamente pa esnan cu ya a entrega un peticion pa permiso di taxi den pasado, mirando cu esaki ta e tipo di permiso mas pidi. Pa medio di e formulario digital, ta bay traha un lista di tur peticion pendiente a base di fecha cronologico pa asina modernisa e servicionan y haci nan mas accesibel na comunidad.

Na aña 2018 e medio local Aruba Native a publica un articulo di ex-minister Chris Romero cu e titulo “No a cambia maneho di traspaso di permiso di taxi, pero si ta brinda un opcion na esnan cu no lo sigui brinda nan servicio.” Den e articulo aki di dia 21 di november di 2018 a menciona cu “e titular di Transporte a tene un reunion informativo unda a informa e grupo di taxista cu e maneho pa cu traspaso di permiso di taxi no a cambia, pero e intencion ta pa bin cu un opcion acerca. “Nos a sugeri pa brinda e taxistanan un oportunidad di por haya algo ora nan dicidi di no brinda nan servicio mas, y cu no tin e posibilidad pa pasa nan permiso pa nan casa of yiu cu ta biba den cas”, Minister Romero a comenta.