(AP) — Merca y su aliadonan a adverti Iran ayera cu economianan occidental mayor ta bay impone sancionnan nobo riba Tehran si bay dilanti cu un plan avansando pa provee misil balistico na Rusia pa su guera cu Ucrania.
Administracion di Biden a bati alarma pa lunas cu Rusia ta buscando misil balistico di alcance cercano for di Iran mientras Moscu ta confronta dificultad pa yena back su suministronan bashi.
Merca ainda mester confirma cu e misilnan a move for di Iran pa Rusia. Pero oficialnan Mericano ta alarma pa comentarionan di oficialnan Irani cu ta sugeri cu e acuerdo ta inminente.
Un accion cu e Grupo di Siete pais ta considerando ta prohibi Iran Air, aerolinea nacional di e pais, di bula pa Europa, segun un oficial senior di administracion di presidente Mericano, Joe Biden. E oficial, kende no tabata autorisa pa duna comentario y a insisti riba anonimato, a nenga di pronostica otro sancion cu Merca ta considerando mas leu cu describi e potencial accion como “medidanan significante.”
“Si Iran bay door cu provee misil balistico of tecnologia relaciona na Rusia, nos ta prepara pa responde rapidamente y di manera coordina, incluyendo cu medidanan nobo y significante contra Iran,” e lidernan G7 a bisa den un declaracion.
Mision di Iran na ONU a bisa luna pasa cu no tin restriccion legal pa preveni e pais di haci benta di misil balistico, pero cu e ta “moralmente obliga pa abstene di transaccionnan di arma durante e conflicto entre Rusia y Ucrania pa preveni cu e guera ta intensifica.”
Merca y Europa ya ta impone sancionnan extensivo contra Iran enfoca riba individuo como tambe limitando acceso di e pais na comercio, servicio financiero, energia, tecnologia y otro sector. E sancionnan riba Iran ta argumentablemente e set mas extenso y comprensivo di sancion cu Merca ta mantene riba cualkier pais, cu miles di individuo y entidad como obhetivo.
E administracion Democrata na januari a bisa cu oficialnan di inteligencia Mericano a determina cu un acuerdo entre Rusia y Iran no a keda completa, pero cu nan ta preocupa cu negociacionnan di Rusia pa adkiri misil for di Iran tabata avansando activamente.
Na september, segun Cas Blanco, Iran a ricibi minister di Defensa Ruso, Sergei Shoigu pa demostra un variedad di sistema di misil balistico – un momento cu a genera preocupacion na Merca cu lo por yega na forma un acuerdo.
Contestando pakico no a consuma e acuerdo ainda, vocero di seguridad nacional di Cas Blanco, John Kirby a bisa cu e no por “papia pa e mullahnan.”
Aña pasa, Iran a completa un acuerdo pa cumpra fighter jet Su-35 for di Rusia y ta buscando pa cumpra ekipo militar avansa for di e pais, incluyendo helicopter di atake, radar y avionnan combat-trainer, segun Cas Blanco.
Merca y otro paisnan a tuma stapnan cu meta pa stroba e suministro, benta of transferencia involucrando Iran y articulonan relaciona cu misilnan balistico, incluyendo e emision di un guia pa companianan priva tocante practicanan di procuramento di misil di Iran pa sigura cu nan no ta sosteniendo e esfuersonan di desaroyo di Iran sin sa.
“Nos a manda mensahenan hopi cla pa Iran pa no hacie, esaki ta un tema di combersacion considerable entre un cantidad di pais na Europa y Merca y mi ta kere cu e preocupacion tocante e eventualidad aki y e necesidad pa atend’e, si ta necesario, ta hopi real y hopi fuerte,” Secretario di Estado, Anthony Blinken a bisa durante un conferencia di prensa ayera na Vienna.
Administracion di Biden ripitidamente a purba di argumenta cu parlamento Ruso, e Kremlin, a bira dependiente riba Iran y Nort Korea pa e armanan cu e tin mester pa bringa den su guera cu Ucrania, y a revela hallazgonan di inteligencia cu ta confirma esaki.
Rusia a adkeri y a usa misilnan balistico Nort Koreano contra Ucrania. Sinembargo, oficialnan Ucraniano ta bisa cu e misilnan Nort Koreano cu a wordo lansa pa forsanan Ruso frecuentemente ta faya nan obhetivo.
Rusia a ricibi centenares di drone di atake one-way, como tambe ekipo relaciona cu produccion di drone, for di Iran, segun Cas Blanco. Administracion di Biden tambe a acusa Tehran di provee Rusia cu materialnan pa construi un planta di fabricacion di drone den oost di Moscu.
Iran inicialmente a rechasa cu a suministra drone pa Rusia. Te despues Tehran a reconoce cu a provee un cantidad chikito prome cu Moscu a lansa su invasion di Ucrania.
