Diaranson, minister di Finanzas, Xiomara Maduro a ricibi e grato noticia cu e compania di rating Fitch Ratings ta revisa nan mira riba Aruba, di stabiel pa positivo. Esaki ta un ‘upgrade’ cu ta refleha e bon direccion di Aruba su economia y finanzas publico.
Na februari Fitch Ratings tabata na Aruba pa asina por haci un evaluacion economico y financiero di nos Pais. Nan a reuni cu varios persona y instancia pa asina por formula nan opinion cu ta keda refleha den e rapport cu a keda publica diaranson 13 di maart 2024 cu ta disponible via https://www.fitchratings.com/research/sovereigns/fitch-revises-aruba-outlook-to-positive-affirms-at-bb-13-03-2024 .
Den su rapport Fitch Ratings ta duna reconocemento na e traaou serio cu ta wordo haci pa Aruba por recobra e credibilidad financiero cu a keda afecta den e añanan di e pandemia. Fitch ta duna Aruba credito pa e desicionnan fiscal cu a wordo tuma pa stabilisa Aruba su finansa publico. Fitch ta positivo tambe riba e manera cu Aruba a bin ta maneha e debe y e disciplina financiero hiba pa por baha debe di Aruba. Ta pasonan importante cu ta hiba Aruba mas cerca di e ‘investment rating’ cu nos Pais tabata goza di dje cerca Fitch net prome cu e pandemia, segun un comunicado di gobierno.
Minister Maduro ta gradici tur persona y instancia cu a reuni cu Fitch, specialmente e ekipo di Departamento di Finansa cu a haci un trabao grandi pa percura pa e trabaonan haci por a keda splica y prueba na Fitch Ratings.
