Ayera diamars, 12 di maart 2024, den presencia di minister di Energia, Sr. Glenbert Croes; director di N.V. ELMAR, Sr. Anthony Irausquin; y directora di Departamento di Asuntonan Economico, Sra. Maria Dijkhoff-Pita, a tuma luga e firmamento di un acuerdo historico entre minister di Asunto Economico, Sr. Geoffrey Wever, y N.V. ELMAR.

Pa prome biaha N.V. ELMAR lo instala stacionnan di recarga vehiculo electrico riba propiedad priva pa un departamento di gobierno, den e caso aki pa Departamento di Asuntonan Economico (“DEACI”) cu ta resorta bao di Minister Geoffrey Wever. Den un comunicado di prensa, e mandatario a expresa su gratitud na N.V. ELMAR pa nan compromiso y participacion valioso cu a resulta den accionnan concreto cu ta trece beneficio pa nos comunidad y nos medio ambiente. “Instalacion di stacionnan di recarga autonan electrico ta e prome paso”, segun minister Wever.

Segun e comunicado, minister Wever tin un vision pa reemplasa tur auto di gobierno pa uno electrico den futuro y asina contribui na sostenibilidad y eficiencia den e aparato gubernamental. Awo a cuminsa cu e proyecto piloto aki conhuntamente cu N.V. ELMAR, y proximamente e autonan di trabao di DEACI lo wordo reemplasa cu autonan electrico conoci como ‘EV’s’ (‘Electric Vehicles’). E paso aki lo resulta den un reduccion significativo den uso di gasolin cu ta contribui grandemente na polucion di nos medio ambiente. E iniciativa aki ta parti di e esfuerso continuo di parti di ministerio pa promove sostenibilidad activamente y cu ta sirbi como ehempel con pa crea un Aruba mas sostenibel.

N.V. ELMAR tin su servicio di EV ChargeUp; su red di cargador pa vehiculonan electrico rond di Aruba. N.V. ELMAR por medio di e acuerdo aki, lo facilita e instalacion di stacionnan di recarga pa autonan electrico, cual ta sirbi como un modelo cu lo por ser replica pa otronan den sector publico of priva, y asina yuda acelera e transicion pa un economia mas sostenibel, segun Minister Wever.

“Mi ta hopi contento cu nos por anuncia e iniciativa aki awe, ya cu cada paso padilanti ta crucial den nos afan pa construi un futuro sostenibel pa nos yiunan. E ta pone e standard y e ehempel pa nos comunidad: cu tur hende mester tuma accion pa adapta y inclui sostenibilidad den nan bida diario. Mi ta spera cu otro departamentonan di gobierno copia e modelo aki,” Wever a conclui.