Mediante un comunicado pa prensa, Cuerpo di Polis a informa cu ayera diamars den oranan di madruga pa mas o menos 1:28 central a haya notificacion di un caso di tiramento na Mandolinstraat.
E prome rapport a indica cu e tiro lo a alcansa un hoben di 17 aña, na e momento ey central di polis a despacha patruya policial di biaha na e sitio como tambe ambulance.
Na yegada di e patruya a haya cu un hoben herida, segun por a compronde cu probablemente un auto di marca KIA Rio color shinishi lo mester a para dilanti e cas na Mandolinstraat y lo a los un tiro. E tiro lo a alcansa un hoben na su curpa e cual tabata pafo di e cas.
Ambulance a presenta na e sitio y personal di ambulance a duna asistencia medico na e victima y despues a transporte cu maximo urgencia pa hospital. Autoridadnan a informa cu e hoben su situacion ta critico stabiel.
Unidad di polis riba caya a cuminsa cu e buskeda pa cu e auto en cuestion, segun nan a indica.
Departamento di recherche a presenta na e sitio y polis tecnico pa asina haci nan investigacion igualmente tambe a notifica Departamento di Slachtofferhulp.
