Un potret di un usuario di rednan social a causa conmocion na Aruba: tabata un imagen devastador, un imagen caminda a expone un daño ambiental den un area protegi pa ley, den un area cu ta contene especienan marino cu ta representa e naturalesa di Aruba y cu lamentablemente, no ta parce di ta importante pa algun compania desaroyado di proyecto.
E imagen di un mashin destrosando un area cu mangelnan pa por realisa un construccion na ex-Isla di Oro a causa desapunto den comunidad di Aruba dialuna ultimo. En conexion cu esaki, redactor di Bon Dia Aruba a tuma contacto cu Fundacion Parke Nacional Aruba (FPNA), na unda Natasha Silva, ken ta fungi como Chief Conservation Officer a splica cu na e momentonan aki e trabaonan pa e proyecto aki a para ora cu nan a bay bishita e area pa haci un quickscan.
Nan como FPNA nunca a duna e aprobacion pa e desaroyo aki, pa motibo cu ex-Isla di Oro ta un area protegi pa ley cu ta cay bao maneho di FPNA. Mangelnan ta un especie protegi pa ley y e area tambe ta cay den ‘Natuur Gebied’ Nieuwe aanwijzing domeingronden als natuurreservaat (AB 2020 no. 67) y Ruimtelijke Ontwikkelingsplan met Voorschriften 2021 (AB 2021 no. 123); mientras cu e isla mes y e lama ta cay den Marine Protected Area (MPA) esta Landsbesluit Parke Marino (AB 2018 no. 77)
Adicionalmente, e area aki tin reconocemento internacional como un Key Biodiversity Area (KBA) door di IUCN y ultimamente a wordo clasifica como un RAMSAR gebied (RAMSAR Site no. 2526) – dunando e area akinan mas balor ainda y den e caso aki, segun Silva ta expresa a nenga diferente parti di ley pero asina mes e desaroyado a continua cu e trabounan dañino pa naturalesa sin permiso.
Silva tambe a sigura cu nan abogado ta trahando riba e caso aki pa wak kico ta e siguiente pasonan legal cu nan ta bay tuma, “nos sa cu DOW y DIP ayera cu nos a entrega un bezwaarschrift e trabounan no a sigui, awor nos mester scucha back tambe di Gobierno di Aruba kico e status ta awor y con nan ta bay sigui,” el a bisa.
Informacion cu FPNA a ricibi ta cu no tin un aanlegvergunning y cu esey ta evaluando pasonan legal.
Na cierto paisnan na Europa a cuminsa regla nan leynan pa loke ta trata ‘Ecocidio’ na november di 2023 Union Europeo a acorda di crea un delito nobo cu ta pretende castiga e dañonan mas grave contra medio ambiente, na Aruba e dañonan cu ta haciendo den e area aki por ta considera como un ‘Ecocidio’ pa motibo cu ta trata di destruccion di naturalesa, ademas Silva a afirma cu esaki no ta prome biaha cu FPNA tin problema cu e compania desaroyado aki cu ta J.O.B Holding & Management “pa hopi aña nan mester ta na haltura di kico ta naturalesa, cua ta nos naturalesa protegi, dicon eigenlijk nos ta protege e area aki y kico ta nan balor, nos tin e area di mangrove banda di Aruba Ocean Villas y nan sa kico ta e balor pasobra hasta nos a bay Corte pa e situacion ey, kiermen nan no por bisa cu nan no sa,” el a sigura.
Igualmente Silva a trece dilanti cu nan por a compronde cu e persona cu tin tereno erfpacht no kier tin erfpacht mas y tabata buscando e oportunidad pa por bende e tereno na otro hende, “nos a tuma contacto cu DIP pasobra nos tabata preocupa cu e situacion aki y nos a sinta cu nan na augustus di aña pasa y despues di e reunion nos a manda DIP un carta bisando cu di ningun manera nos lo bay di acuerdo cu desaroyo di Isla di Oro, pasobra e isla mes ya cu e ta erfpacht bo por compara esaki cu e erfpacht di Parke Arikok, pero esaki di isla di Oro ta den lama, den Parke Marino kiermen e situacion di Arikok ta mesun cos, bo tin un erfpacht y bo no por haci cualkier cos, e no ta manera un tereno priva pafo di un area protegi, bo tin hopi regla cu bo mester tene na cuenta cune.”
Den november 2023, J.O.B. Holding & Management a tuma contacto cu FPNA y a haya invitacion pa bay un meeting pa compronde kico ta e intencion cu Isla di Oro. Dia 4 di januari 2024, FPNA a responde na J.O.B. Holding & Management cu un carta unda cu a indica cu no ta bay di acuerdo cu ningun desaroyo pa Isla di Oro.
Siguientemente dia 18 di januari 2024 J.O.B. Holding & Management a invita FPNA conhuntamente cu otro organisanicacionan local pa un stakeholder engagement session unda cu nan a informa cu nan lo ta haciendo diferente trabounan riba Isla di Oro pero sin a presenta un plan concreto cu por ser revisa. No obstante e posicion di FPNA no a cambia.
Na november di aña pasa e area aki a cuminsa forma parti di Convenio di Ramsar Area bao e parti di Costa Zuid e cual ta un di e areanan cu mas biodiversidad, status di Ramsar tin como meta pa proteha e areanan aki sin interveni cu actividadnan economico, enfatisando reduccion di daño y restauracion di naturalesa den caso di daño cu ta inevitabel.
Pa loke ta trata e construccion mes, Silva a menciona cu e desaroyado no a mishi cu e ruinanan bieu cu ta di concreto pero nan a kita esun cu ta di metal y nan a trece hopi saco di santo blanco caminda dialuna mainta nan a basha full e santo blanco pa crea un beach.
“Nan a daña e mangrove cora y esey tambe ta contra ley,” Silva a bisa y tambe a agrega cu nan como fundacion ambiental nan deber ta trek esaki y follow up tur cos cu e desaroyado no mag di haci.
El a trece dilanti cu FPNA ta comprometi na e proteccion di e area importante aki – e unico area na Aruba unda ainda ta wak e ‘Poder di 3’ conecta na otro sanamente, esta e mangelnan, yerbe di lama y e rifnan di coral – 3 diferente sistema ecologico crucial cu hunto ta provee un variedad di beneficio pa e ser humano y Aruba su medio ambiente.
