Den un charla pa empodera hendenan muhe cu un energia y un carisma unico, Milena Reyes miho conoci como Psico-Milly a trece dilanti cu e hecho di ta un hende muhe den mundo aki ta un dicha basta grandi, pa motibo cu nan ta esnan cu ta duna bida na otro den nan mesun curpa y esey ta pone pa nan mira e mundo di un manera diferente.

Milena Reyes ta un psicologo clinico Venezolano cu tin mas di un decada bibando na Aruba, tambe e ta locutor den un programa di radio hunto cu Mayo Stoppels ken tur mainta ta papia di diferente topico di inspiracion pa hendenan muhe na Aruba.

Recientemente na nivel mundial a celebra e Dia Internacional di Hende Muhe na unda Milly a duna un charla pa papia di ‘sororidad’ un palabra cu ta nifica amistad entre e hendenan muhe specialmente pa loke ta trata empoderamento.

“Pa fomenta e hermandad entre nos, pa crea tribunan entre nos,” el a bisa.

El a papia tambe tocante liderazgo femenino, e participacion di e hendenan muhe den posicionnan di poder, tuma di decisionnan den organisacionnan na unda hendenan muhe no ta solamente influi den otro personanan “a nos ta nos influencia mayor den nos fuente di inspiracion, den nos relacion interpersonal y cu ta forma parti di inteligencia emocional.”

A traves di e liderazgo femenino, segun Milly ta conta, sororidad ta representa e neutralisacion di e diferencia salarial cu historicamente ta existi entre hende homber y hende muhe, “ta un lucha cu te ainda ta toca nos y ainda ta falta mas trabou pa haci den esaki.”

Pa hendenan muhe ta hopi importante comparti balornan, debi na liderazgo femenino, e hecho cu nan ta lider, esey ta duna e base pa companianan y empresanan cu ta comparti balornan lo por uni, ta cuminsa crea un red of aliansanan strategico cu ta na fabor di crecemento di e hendenan muhe.

Tambe e ta considera esaki como un tema di husticia, unda por ehemplo hendenan muhe no por a vota den decadanan atras, kisas debi na esey, hendenan muhe ta mas sensibel pa loke ta trata e palabra igualdad unda liderazgo femenino ta inclusivo, loke ta permiti genera identidadnan den e ekipo di trabounan y haci impulso di lidernan nobo.

“Esaki ta sororidad, pasobra bo tin bo ekipo di trabou y ora un hefe ta inclui su empleadonan pa participa, ta kere den nan talento, di tene un bon ekipo, esey ta genera un siguridad profundo den ekipo y akinan e hendenan muhe ta saca afo nan mayor potencial,” Milly a sigura.

Competencia, envidia y rivalidad ta emocionnan cu tur dia tur hende ta sinti manera Milly ta afirma, tur humano ta biba e emocionnan ey den bida y “bo no mag di haya berguensa di bisa mi tin envidia pa bo, identifica loke bo ta sinti ta haci bo sinti mas miho, sino bo no ta haciele esey ta bira un esclavitud.”

Empatia ta un palabra clave, Milly ta bisa cu percura pa genera un aproximacion pa loke otro persona ta sinti, purba di pone den sapato di otro no ta un cualidad exclusivo di hende muhe, hende homber tambe ta sinti esaki.

Hendenan muhe ta experto pa e soluciona conflictonan di un manera mas comprensivo, hende homber tambe ta haciele pero, pa hopi biaha nan no ta capacita den e tema di inteligencia emocional y nan ta trapa loke ta relaciona cu procesonan relacional of psikico den ekipo di trabou, si ta papia di liderazgo.

Pa algun biaha, hendenan muhe ta prefera di traha cu hende homber, e motibo ta cu hendenan muhe ta rivalnan of personanan cu mester domina, esaki ta perhudica di un manera significativo e organisacionnan debi cu por afecta e obhetivonan den comun cu e organisacion ta plantia y e relacionnan interpersonal entre trahadonan.

Inteligencia emocional y spiritual segun Milly ta hermentnan cu por yuda hopi, inteligencia emocional ta esun prome cu ta conoce emocionnan, despues mester identifica nan por ehemplo, con ta reacciona un hende ora e tin rabia y despues di esey gestiona nan, esey ta bay duna como resultado cu e relacion intra personal (amor propio) y inter personal lo ta valioso, “respet y amor pa nos mes y respet pa otronan, si no tin esey no tin manera cu por stima otro hende,” el a declara.

E respet ta basa den e hecho cu por comunica cu otronan e sentimentonan, cu no mester ataca otro, mester tin e capacidad di maneha e emocionnan y no tuma decisionnan na e momento ey, “percura pa bo no comunica na momentonan di rabia, percura bay haci actividadnan cu por yuda supera e emocionnan ey y asina bo por respeta bo mes den e comunicacion cu otro y respeta otronan ora ta papia.”

Di e forma ey inteligencia emocional por yuda hendenan muhe pa bira nan mesun lider di nan bida, pa bira un bon lider den organisacionnan den cual ta participa, “Aruba ya caba tin un prome minister cu ta un hende muhe y esey ta un logro pa e genero, esey ta liderazgo femenino, pakico nos no por considera esey pa nos mes?” el a finalisa.