Minister Wever: “Permiso di negoshi, specialmente pa loke ta San Nicolas y Oranjestad ta esunnan cu tin prioridad pa nos”
Ayera mainta minister di Asuntonan Economico, Comunicacion y Desaroyo Sostenibel, Geoffrey Wever, a tene un conferencia di prensa na unda el elabora ariba e “call to action” na tur comerciante y of propietario di edificionan den centronan di ciudad na Oranjestad y San Nicolas.
Siman pasa minister Wever tabata den un conferencia di prensa hunto cu KvK y VNO pa anuncia e Aruba Investment Summit cu lo ta tumando luga na Den Haag dia 21 di maart pa purba atrae inversionistanan Hulandes pa wak oportunidadnan economico na Aruba.
El a indica cu pa hopi tempo tin diferente areanan, entre otro na Oranjestad y San Nicolas cu ta bayendo den un direccion cu mester intervencion pronto di gobierno pa yuda desaroya e areanan aki.
E mandatario a remarca cu den e areanan aki tin hopi edificio bandona y hopi cu ta cera y cu no tin uso comercial mas. “Nos a pensa cu durante e summit aki na prome luga nos kier mustra e desaroyo economico cu Aruba a pasa despues di Covid, con nos a recupera, y tambe mustra e inversionistanan e oportunidadnan cu inversion den economia di Aruba ta ofrece,” el a subraya.
Minister Wever a splica cu e vision ta pa transforma e area di Oranjestad den un centro gastronomico caminda cu tin vivienda, entretenimento, actividadnan, retail.
Esnan cu ta demostra pa showcase nan propiedad, hendenan cu tin un propiedad cu ta bandona pa hopi aña, cu no tin un meta economico mas y cu ta dispuesto pa huur of bende, of por ta e personanan aki ta buscando un partner strategico of inversionista pa desaroya un proyecto, por manda tur informacion pa asina durante e summit na Hulanda por purba match e iniciativanan di e sector priva na Aruba cu esnan na Hulanda cu kisas ta interesa den haci un inversion na Aruba.
Esnan interesa por registra nan propiedad of manda nan idea na e e-mail info@investinaruba.com pa showcase esaki durante e investment summit.
Propiedadnan den e centronan di ciudad di San Nicolas y Oranjestad, sea terenonan bashi, structuranan bandona, of espacionan sub-utilisa, ta representa potencial pa explora. Informacion tocante e propiedadnan aki ta importante, nan disponibilidad, condicion, y e interes di nan doñonan pa bende, huur, renoba, of colabora pa establece negoshinan unico dentro di nan edificio.
“Nos ta custumbra di profila nos mes como e destinacion turistico. Awo nos ta bay showcase Aruba na Hulanda como e pais pa haci inversion tambe. E iniciativa aki no ta solamente pa identifica propiedadnan disponibel, pero tambe ta fomenta un dialogo entre doñonan di propiedad y potencial inversionistanan, creando partnershipnan cu lo sirbi como e fundeshi pa revitalisacion di nos centronan di ciudad,” minister Wever a resalta.
Contestando pregunta di miembro di prensa, minister Wever a splica cu pa hopi tempo hopi edificio ta bandona y esey ta hustamente e meta di e investment summit. El a señala cu tin hopi real estate bandona cu por wordo converti y/of renoba den vivienda parti ariba y retail of horeca parti abao, tanto na San Nicolas como Oranjestad.
“Nos ta wak e cifranan di turismo ta hopi positivo y nos ta kere ta bira tempo pa purba redirigi e parti turistico pa e areanan di San Nicolas y Oranjestad y ofrece algo diferente,” el a resalta.
Un miembro di prensa a puntra pakico a scoge pa bay Hulanda pa wak si tin inversionista interesa den Aruba, siendo cu mayoria biaha Mericanonan ta esunnan cu ta mustra interes den inverti na Aruba.
Den su contesta minister Wever a splica cu den e caso aki e idea ta cu nan no ta enfoca den e sector hotelero, pero ta enfoca mas bien den e centronan di ciudad, y esey ta un escogencia cu nan haci. El a indica cu nan por a scoge pa bay cu e mercado Mericano, pero el a resalta cu pa motibo cu pa hopi aña no tabatin intento pa fortifica e relacion comercial entre Aruba cu Hulanda, cu esaki ta un bon momento pa haci esey.
Ariba e pregunta tocante ki tipo di inversionista Aruba kier atrae cu e summit aki, e mandatario a splica cu nan kier atrae inversionistanan cu ta dispuesto pa yuda den e desaroyo di e centronan urbano y cu ta bisa cu nan ta wak oportunidad economico den por ehemplo e sector horeca den centro di ciudad, of den vivienda.
“Nos ta buscando inversionista cu ta pensa ariba sostenibilidad y cu kier contribui na inversion cu ta reduci e impacto riba medio ambiente, e inversionista cu ta pensa mas den desaroyo economico y cu ta kere cu mester cambia modelonan di haci negoshi,” el a enfatisa.
El a agrega cu den e intento aki nan ta enfoca pa mas o menos 100 persona participa, hunto cu un grupo cu lo participa virtual, pero nan ta realisa cu esey no ta significa cu nan ta bay yega na 100 transaccion, pero e meta ta pa haya algun cu ta dispuesto pa bin Aruba y asina ta cuminsa traha riba e desaroyo ey.
Miembro di prensa presente a trece pa dilanti e punto cu den pasado tabatin hopi inversionista tabata interesa pa inverti y haci negoshi na Aruba, pero e proceso pa pidi permiso y haya un permiso di inversionista na Aruba y tur rekisitonan tabata un obstaculo grandi. El a puntra si e situacion aki ta bay flexibilisa of si den e caso aki e ta bay ta diferente pa Hulandesnan
Minister Wever a splica cu ya caba nan a flexibilisa e maneho di permiso di negoshi, a elimina diferente rekisito cu no ta mas di e tempo aki y cu ta causa cu e inversionistanan ta perde mas tempo ta aplica pa un permiso cu e meta pa e permiso sali mas lihe.
El a remarca cu pa loke ta e area di San Nicolas y Oranjestad nan a amplia e posibilidad pa haya permiso, pues pa esnan cu ta pidiendo permiso pa haci negoshi den Oranjestad y San Nicolas no tin ningun problema y e proceso e ta bayendo hopi lihe y completamente digital. El a indica cu nan tin un target di 10 dia pa e permiso sali, pero esaki no ta logrando pa entre otro falta di personal.
“Permiso di negoshi, specialmente pa loke ta San Nicolas y Oranjestad ta esunnan cu tin prioridad pa nos y nos a pone den nos maneho como un area determina unda cu si bo inverti bo permiso ta sali mas lihe cu ta posibel,” el a enfatisa.
