Mañan 6 di maart for di 6.30p.m. pa 9.00p.m ta bay tin un actividad literario, cultural y linguistico na Biblioteca Nacional Aruba, na caya George Madurostraat 13, den cuadro di celebracion di diferente fiesta hunto.

Biblioteca Nacional Aruba, Departamento di Cultura Aruba hunto cu gestor cultural Mirto Laclé ta bay presenta un programa multifacetico cu enfoke riba literatura, poesia, declamacion, canto, baile, musica, cultura y educacion en general.

Ta bay tin invitadonan special cu lo comparti nan pasion pa arte den e disciplina di arte cu cada un di nan ta eherce, entre otro, obranan artistico musical, arte di fotografia, arte di filmacion, tomo di poesia, y presentacion di dos obra literario.

Autor y poeta Ariana Koolman Chirino ta bay deleita esnan presente cu algun poesia dedica na celebracion di Dia Internacional di Hende Muhe.

Maybelline Arends-Croes y su coro ta bay presenta cu algun cancion y Vivian Lampe ta bay toca piano.

Musico, autor y ‘motivational speaker’, Ashok Hirdaramani, naci na Sri Lanka y cu tin 43 aña biba na Aruba, ta bay presenta su buki Passion – Amazing – Mindset, e prologo ta skirbi pa Wini Paulo, filosofo, poeta, autor di Corsou, e buki ta trata temanan manera ‘Change and create the life you truly desire. Discover a new synthesis to unfold the real secret to manifest and attract abundance’.

Roberto Croes ta bay ta presente cu su ultimo tomo di poesia Sentimento IV cu ta un coleccion di poesia basa riba amor. E poesianan aki ta mustra cu bida tin su proposito y cu mester biba e bida cu amor, cu fe, cu dignidad, cu humildad y cu respet.

Jossy Farro, un Arubiano biba pa varios aña na Hulanda ta bay presenta un obra fotografico, dedica na pianista Livio Hermans (d.f.m.) Un potret saca pa Jossy Farro na Aruba durante un actividad na Biblioteca Nacional Aruba cu cual el a obtene e prome premio di foto di luna februari participando pa Fotoclub de Zoeker na Hulanda cu e tema Zonido.

E anochi aki tin presentacion di grupo musical forma pa Ashok Hirdaramani and friends cu ta bay interpreta salsa y musica di Carlos Santana.

Luna di maart ta un luna yen di celebracion, como Dia Internacional di Hende Muhe, Dia di Himno y Bandera, Dia Internacional di Poesia y na April Dia Internacional di Derecho di Autor. Entrada pa e actividad aki ta gratis. Por tuma contacto cu Mirto Laclé, cel. 7426274