Awe 4 di maart ta celebra Dia Mundial Contra Obesidad cu cifranan alarmante

Obesidad y sobrepeso ta ser defini como un acumulacion no normal of excesivo di vet cu por resulta perhudicial pa salud, e fecha di 4 di maart ta busca conscientisa e personanan riba e daño cu por tin pa nan organismo cu un dieta halto den vet y sucu, e cual ta esun di mas popular y comun rond di mundo, incluyendo Aruba.

Pa aña 2024, e lema di e campaña mundial di Panamerican Health Organization (PAHO) ta “Let’s talk abaout obesity and…” cu e obhetivo di probecha e poder di Dia Mundial di Obesidad pa cuminsa tene conversatorionan tocante e topico aki, pa observa e salud, e hubentud y e mundo rond di nos pa wak con por aborda e tema aki hunto.

Pa PAHO e impacto economico global calcula pa sobrepeso y obesidad pa aña 2035 ta bay ta 4.34 triyon dollar y ta bay ser aumenta na un 100% den e muchanan y hobennan entre añanan 2020 y 2035.

Dia Mundial di Obesidad ta ser convoca pa Federacion Mundial di Obesidad y nan miembronan rond di mundo, segun datonan di Organisacion Mundial di Salud (OMS) obesidad a yega na nivelnan di epidemia na nivel mundial.

Nan ta calcula cu for di 1975 e malesa aki a triplica logrando cu na 2016 ya caba tabatin 1.900 miyon adulto cu tabata padece di dje ademas di 340 miyon di mucha y hobennan.

Pero kico ta obesidad?

Por compronde cu obesidad ta un acumulacion no normal di vet cu por tin consecuencianan dañino pa e organismo.

Ademas, ta e prome paso pa otro patologia manera presion arterial, diabetes, indice halto di colesterol, problemanan cardiovascular, riesgo di padece cancer, entre otro.

E unico manera di preveni obesidad ta hibando un dieta di alimentacion hopi mas sano y no busca fast food, cu ta posee tur elementonan cu ta genera obesidad morbido.

Ademas di bon alimentacion, ta necesario pa personanan tin un rutina di ehercicio of movecion cu ta permiti evita e acumulacion di vet producto di sedentarismo, kiermen cu e persona no ta haci ni un tipo di movecion.

Hopi persona rond di mundo ta come relativamente sano, pero nan ta ser afecta pa acumulacion di vet den nan barica cu ta pa via di keda sinta varios ora dilanti un computer, por ehemplo.

Ta importante no solamente reconoce cu obesidad y sobrepeso ta un malesa, sino tambe ta importante pa considera e riesgonan di otro malesanan relaciona cu obesidad, den algun casonan, ta existi un conexion entre obesidad y otro problemanan di salud, specialmente salud mental.

Pa e motibo ey, mester cambia e narativa pa reduci e tabu y e culpa di esnan cu ta asocia cu obesidad pa garantisa cu e personanan cu ta biba cu sobrepeso por ricibi apoyo.

Salud ta determina pa e mundo cu ta rondia nos y un medio ambiente saludabel componi di varios factor manera stabilidad den e clima, e aire cu e cual ta hala rosea, alimentonan disponibel pa consumo y con nan ta ser comercialisa, pa papia tocante obesidad na nivel mundial mester actua y crea ambientenan saludabel y sostenibel unda e personanan por biba bidanan mas largo y mas saludabel.

E hobennan nunca ta e causa di ambientenan no saludabel y no sostenibel, al contrario, nan ta esun di mas afecta, p’esey mester scucha nan directamente tocante nan perspectiva y kico nan ta kere cu ta e cuestion clave.

Obesidad y sobrepeso por ser traduci den hopi cos diferente y no ta existi un plan unico pa combatiel’e, tur hende mester compronde e raiznan compleho di obesidad pa por tuma medidanan cu por funciona den nos pais, nos comunidad y den nos mesun curpa.

E curpa humano tin mecanismonan incorpora pa por protege su mes di hamber, esey ta haci cu ta dificil pa mantene e perdida di peso, alimentonan procesa (Fast food) cu ta rond di mundo ta contribuyendo di un manera hopi lihe na aumento di obesidad.

Sin acceso na personal capacita como profesionalnan di salud, e personanan cu ta sufri di obesidad of sobrepeso no ta bay alcansa ni ta bay mantene un obhetivo di peso saludabel den un plaso largo, ademas e falta di soño ta altera e hormona cu por afecta e peso di e persona generando pa algun biaha halto nivel di stress.

Discriminacion y tabu por tin consecuencianan importante pa un hende cu ta sufri di obesidad of sobrepeso.

Debi na tur esaki, PAHO a cuminsa tuma medidanan den esaki na unda por cuminsa mira etiketanan di advertencia den cierto productonan mustrando cu nan tin un halto contenido di vet, sucu y salo, cu e obhetivo di ataca e problema creciente aki di obesidad den region.

Na 2023, OMS a publica datonan mustrando e tasa hopi abao di impuestonan aplica na productonan menos saludabel manera alcohol y bebidanan cu hopi sucu, e resultadonan ta destaca cu mayoria di paisnan no ta utilisando impuesto pa incentiva na un comportacion mas saludabel.

Pa finalisa, ta importante pa destaca cu cada aña 2.6 miyon persona na mundo ta muri debi na consumo di alcohol y mas di 8 miyon debi na un dieta no saludabel, por lo tanto, un aumento di impuesto riba alcohol y bebidanan cu hopi sucu lo por reduci e cantidad di morto pa e causa aki, segun OMS.